Narsarsuarmi innuttaasut Narsarsuup siunissaa pillugu aalajangiisoqareernikuunerata kingorna ersarissumik suliniutigineqartunik paasitinneqarnissaat kinguaattooqqasoq aaqqiivigineqarli.
Ippassaani ulloq kujataannut alianartuuvoq, ukiorpassuarni nunatta avataaniit timmisartukkut angallanneq ingerlanneqarsinnaasimasup oqaluttuaannanngornissaannut alloriaqattaarnerit annertooq aqqusaarneqarpoq.
Inuit Ataqatigiinniit eqqaasitsissutigissavarput mittarfissualiornermut tunngatillugu partiittut ikinnerussuteqarluta aaqqiinissaq allatut ingerlanneqassasoq kissaatiginikuugatigu, taamaattorli manna tikillugu partii taannatuaavugut taamak isumaqarsimasut.
2022-ip aallartilaarnerani Attaveqaasersuutinut ineqarnermullu Naalakkersuisuutitaqarnitta nalaani Narsarsuup siunissaa pillugu suligasuartussanik pilersitsivugut, kommuni kujalleq taamanikkut piumaffigaarput inuttalersuisussasoq tamannalu aamma suliarisimavaat. Ajoraluartumillu manna tikillugu suli sumilluunniit tigussaasumik suliamik naammassisamik tigusaqarsimanngilagut.
Kommune kujalliullu suli nalorneq pigigaat tusagassiarineqarnerani tusarparput, naak tulluarnerpaajussagaluartoq kommunip nammineq aamma susassaqarfigalugu siunnerfeqarfigisimassagaa tamanna ajuusaarnaqisumik piunngilaq.
Taamaammallu Naalakkersuisut piaartumik Narsarsuup siunissaa pillugu iliuusissanik pilersaaruteqarsimagunik nalunaaruteqarasuaqqullugit kaammattorpagut.
Assorujussuaq Narsarsuarmi innuttaasut qanigisaanilu najugaqartut misigeqatigaagut, siunissamik nalunartumik inissisimatinneqartuarneranni, Naalakkersuisullu susassaqartut kaammattorpagut innuttaasut tikillugit oqaloqatigiartoqqullugit ulluni imaannaanngitsuni atugaanni tusarniaqqullugit taamaaliornikkummi iliuuserisinnaasat pineqartut peqatigalugit suliarineqarsinnaaniassammata, piffissarmi sivisunngitsoq qaangiuppat aalijangiisartut amerlanerussuteqartut aalijangigaat piviusunngulersoq Narsarsuarmiut sumiginnagaanerat killeqartariaqarmat.
Mariane Paviasen Jensen
