Inuit Ataqatigiit siullermik oqaatigiuavarput arnarpassuit spiralilersorneqarsimasut, ilaqutaasullu eqqunngitsumik pineqarsimanerannik misigeqatigingaaratsigit. Qanortoq ikeq annernartoq mamisarneqarili oqilisaanneqarlusilu.
Naalakkersuisutut imaannaasimanngilaq danskit naalakkersuisui suleqatigissallugit, piumasaralugu spiralilersuisimaneq qulaajarneqassasoq. Danskimmi naalakkersuisui annikitsuinnarnik aningaasaleerusussimapput. Assoruussimaqaagullu qulaajaanissaq pillugu danskit naalakkersuisuisa annertunerusumik aningaasaliinissaannut. Aamma Naalakkersuisutut inuit pisinnaatitaaffiannik unioqutitsisoqarsimaneranik misissuisoqarnissaanik piumasarput danskinit itigartilluinnarneqarsimavoq.
Maannakkulli qulaajaaneq naammassivoq. Danskit akisussaaaffeqarlutik paasivaat, iliuuseqartariaqarpullu!
Inuit Ataqatigiit arnanut, ilaqutariinnut, nunaqqatigiinnullu utoqqatsertoqarnissaa pissusissamisoortutut isigaarput. Arnat pineqartut taarsiiffigitinnissaat pissusissamisoorpoq. Taannalu suliaq ingerlanneqartoq nalunngilarput.
Utoqqatsernerup taarsiiffigitinnerullu kisimik ikeq mamisinnavianngilaat. Inuttut, inuiattut innarlerneqarsimanerput utoqqatsernikkut taarsiiffigitinnikkullu oqilisinneqarsinnaavoq. Danskilli naalagaaffiat suli pisussaaffeqarpoq.
Inuiattut killilersorniarneqarsimanerput, kinguaasatsinnik annaasaqarnerput utoqqatsernerinnakkut qaangernavianngilarput. Kinguaariit arlallit kingunerluutinik atugaqartut katsorsartittariaqartassapput, sakkortuumik misigisaqarsimasut katsorsarttariaqartassapput. Tamakkorpassuit danskit naalakkersuisuisa aningaasaliiffigisariaqarpaat.
Inuiattut pineqarsimanerput uppernarsarneqartoq mamianangaaqisoq qaangerniarlugu danskit naalakkersuisui akisussaasuugamik suliaqartariaqarput.
Maannakkut inuiattut mamiatsaqqanitsinni eqqarsarnarpoq aamma allat suut isortuunneqarnersut saqqummerartariaqalerumaarnersut. Suliassat siunissami aggersumi takkuttartussat pitsasumik akisussaaffilimmillu suliarineqartarnissaat Inuit Ataqatigiinniit suliariuartassavarput. Suliariuartassavarput eqqunngitsumik pineqarnivut Inuiattut nukittuunngorluta qaangerniartarniissaannut iliuuseqarnissamut.
Mimi Karlsen
Inuit Ataqatigiit
