Isumasioqatigiinnissamut aggersaanermi tunngavik
Kalaallit Danmarkimiittut Danmarkimi oqartussaasunit inuiaassusertik pillugu nikassarneqarlutillu immikkoortinneqartarput. Tamanna Naalagaaffiit Peqatigiit nunat inoqqaavisa pisinnaatitaaffii pillugit immikkut nalunaaruteqartartumit Danmarkimi kingullermik tikeraarnermini naqissuserneqarpoq.
Taamannak ilaatigut oqaaseqaateqarpoq kalaallit meeraannik Danmarkimi pinngitsaalisamik inissiisarnerpassuit tunngavigalugit. Meeqqamik arsaarneqarneq angajoqqaat misigisinnaasaanni sunniuteqarnerpaasarpoq. Aalajangiinerit tamarmik patajaatsumik tunngaveqarnissaat oqartussaasut pisinnaasartik tamaat taamaammat qulakkeerniartussaavaat.
Pissutsit massakkut taamaanngillat oqartussaasummi nunani killerni angajoqqaat piginnaasaannik misissueriaatsit atortarpaat, kalaallit oqaasiinut kulturiannullu isiginninngitsut. Misissuinerit kalaallinut ilaqutariinnut naapertuutinngitsut tamakkiisumik naliliinermut ilaatinneqartarput meeqqallu kukkusumik tunngaveqarluni arsaarinnissutigineqarneranut naammanngitsumik oqalutseqarneq peqatigalugu aalajangiisooqataasinnaallutik.
Kalaallit Danmarkimiittut nunap inoqqaavisut nunani tamalaani inatsisitigut immikkut illersugaapput. Illersuineq Danmarkimi naalagaaffimmik pisussaatitsivoq kalaallit oqaasiinik kulturiannillu Danmarkimi innimisunnissamik.
SSA23-p atuutilersinnissaanut isumaqatigiissuummi tarnikkut misissuinerit nutserlugillu kalaallinut naleqqussarneqarnissaannut 7,8 millioner kr.-it illuartinneqarnissaat iluatsippoq. Misissuutilli naleqqussarneqarnissaat naatsorsuutigisamit pisariunerullutillu annertunerusut ajoraluartumik paasineqarpoq aatsaallu 2027-mi piareersimanissaat naatsorsuutigineqarluni. Taamaakkaluartoq kommunini tamangajalluinnarni misissuinerit oqaatsitigut kulturikkullu naleqqussarneqanngitsut suli atorneqarput, aali tamatumunnga atatillugu inatsisitigut innarlitsaalisaanikkut ersarissumik eqqarsarnartoqaraluartut.
Ministeri taamaammat isumasioqatiginissaanut aggersarneqarpoq Danmarkip nunani tamalaani kalaallinut pisussaaffimminnik naammassinninnissaa kiisalu kalaallinut innuttaasunut oqaatsitigut kulturikkullu naleqqussarneqanngitsunik misissuinernik atuisarnermik unitsitsinissaq qulakkeerniarlugit.
Isumasoqatigiinneq uani takuuk (Folketingip nittartagaanut ingerlateqqinneqassaatit)
