Aaja Chemnitzip, Inuit Ataqatigiit, oqallisissiatut Sermitsiami ilanngussaa
Nunarsuaq allanngoriartorpoq ataatsimullu aallaaveqarnissamik pisariaqartitsineq aatsaat taamak pingaaruteqartigilerpoq. Nunanut allanut politikki nunatsinnit akisussaaffigineqalersinnaanngitsut ilaminiinnaraat, Kalaallit Nunaatali aalajangeeqataaffigisinnaanngisaminik ataatsimut nunanut allanut sillimaniarnermullu politikki akuerissavaa?
Inatsisitaarfik Danmarkimi sapaatit akunnerisa matuma siulianni nalliussineqarpoq. Kalaallit Nunaata naalagaaffittut inatsisissaanut missingersuut siunissami inatsit tunngaviulersinnaajumaartoq ukkataralugu aaqqissuussamut peqataavunga. Taamak pisoqarnissaata tungaanut suliassaqarfiit amerlanerusut akisussaaffigilernissaat sulissutigissavarput akisussaaffigilersimanngisagullu pitsanngorsarlugit.
Inatsisitigut ullutsinni atugassarititaasut iluanni suliassaqarfiit akisussaaffigilersinnaanngisatta amerlanngitsut ilagaat nunanut allanut sillimaniarnermullu politikki. Aqqutissaq Københavnimi aalajangerneqartarpoq ukiunilu kingullerni aalajangeeqataasinnaanerulersimagaluarluta suut tamaasa aalajangiiffigisinnaanngilagut. Nunanummi allanut sillimaniarnermullu politikkit pillugit apeqqutinut Danmark naaggaarsinnaatitaavoq. Tamanna ilaatigut Kangilinnguani sakkutooqarfitoqqamut Kinamiunit pisiarineqarusussimasumut, Danmarkimili aaqqiissutissarsineqartumut tunngatillugu takuarput.
Ataatsimut aallaaveqarnissaq pillugu qujanartumik isumaqatigiikkajunneruvugut. Kingullertigut Ruslandip Ukrainemik eqqunngitsumik tiguaaniarneranik assuarinninnermut atatillugu, tamatumani tamatta Ruslandimut pillaatinik atulersitsigatta. Isumaqatigiissinnaajunnaaruttali qanoq pisoqassava?
Israelip Gazamik naligiinngilluinnartumik saassussinera, Palæstinamiut 37.000-init amerlanerusut toqutaanerannik nassataqartoq ataatsimoortumik pillaanerit oqaluttuarisaanermi ajornersaannut assersuutaasoq Inuit Ataqatigiit assuarilluinnarpaat. Pinngitsunik oktobarip arfineq aappaanni saassussineq aamma assuaraarput.
Aserorterinerujussuit inuillu amerlaqisut annaaneqartut takusagut qanorluunniit pitsaanerulersinneqarsinnaanngillat. Israel inuiannik toqutsisimasutut nunani tamalaani Haagimi eqqartuussivimmit unnerluutigineqarpoq kiisalu sorsunnermi pinerluuteqarsimasutut inuiannullu pinerluuteqarsimasutut Israelimi naalakkersuisut arlaqartut, tamatumani maanna premierministeriusoq ilanngullugu tigusarineqarnissaat nunani tamalaani eqqartuussivimmit noqqaassutigineqarsimalluni.
Danmarkimi naalakkersuisut Israelimut piumasaqaatitaqanngitsumik tapersersuinertik sivitsortumik attappaat Palæstinallu namminerisamik naalagaaffittut akuerineqarnissaanut akerliullutik qanittumi taasillutik. Ilutigitillugu Israelimut sakkunik tunisassiorneq suli akuerineqarpoq, assersuutigalugu Hollandimi akerlianik pisoqartoq. Taamaaliornikkut sorsunnermi inuiannik ikiuiniarnermut unioqqutitseqataasoqaratarsinnaavoq.
Sammivik tamanna uatsinnit kalaallinit akuerisinnaanngilarput. Inuiattut nunasiaataasimasutut Palæstinamiut aliasuutaat paasisinnaavarput anguniagaannillu peqatigilluartutut misigaluta. Tamanna inuit internettikkut attaveqaqatigiittarfiini aqqusinernilu sumi tamaani takusinnaara. Europami nunat arlallit Palæstina namminerisamik naalagaaffiunera akueraat. Kingullermik akuersaarput Norge, Spanien Irlandilu.
Naalagaaffeqatigiinnermut atatillugu naligiinnermik oqaaseqarneq ilumoorukkaanni tamanna nunanut allanut politikkimut sunniuteqarnerunermik aamma isumaqartussaagaluarpoq. Palæstina namminerisamik naalagaaffiunera akuerissavarput Danmarkillu Israelimut sakkunik niuernini unitsissagaa innersuussutigalugu. Naalagaaffiit Peqatigiinni sillimaniarnermut siunnersuisoqatigiinni ilaasortanngorneq eqqissinermik aaqqiissuteqarnissamut ilungersuuteqarnissamut aamma atorneqartariaqarpoq. Nunarsuarmi inissisimanerput aatsaat taama pingaaruteqartigilerpoq Inuit Ataqatigiinnullu inuiannik inuillu pisinnaatitaaffiinik illersuinissarput aalajangiisuulluinnarluni.
