Suleqqinnissamut piareerpugut
Ukiuni kingullerni Siumut pitsaasumik suleqatigisimavarput, inatsiliornikkut politikkikkullu annertuunik suliaqaqatigisimallugu.
Piffissami kingullermi nunani tamalaani suleqateqarnissamik nunanullu allanut politikki pillugu partiit siuttui ataatsimoorussaqarlutik ingerlasimapput, taamaakkaluartorli takusinnaavarput Siumumi ilaasortaasa ilai naalakkersuinikkut ataatsimoorunneqartunut illuatungiiliisunik oqariartuuteqartut.
Nunarput anguniagaqartilluni ataatsimoorussarqarnissaa aatsaat taama pingaartigaaq, avatitsinnit tatiniarneqarnerput ima annertutigitillugu aalajangiisuulluinnarpoq naalakkersuinikkut ataatsimoorussaqarnikkut nunanit allanit tatigineqarsinnaanissarput. Tatigineqarnerlu aatsaat angusinnaavarput nunatsinnit nipi anguniagarlu ataaseq ataatsimoorukkutsigu.
Inuit Ataqatigiit nunarput inuilu pinnagit, inatsisit inatsisartuni aalajangersakkat atuuttut qimallugit, inuit ataasiakkaat qanoq iliuusaannik nunatta tatiginartuunerata sanngiillisinneqarnera peqataaffigissanngilarput.
Nunatut siunnerfeqarpugut, qinersereernerup tulliani suleqatigiittariaqarpugut, sunaluunniit pineqartillugu nunarput salliujuartariaqarmat. Inatsisit malillugit ingerlassaagut, qinersinerlu maanna suaarutigineqarpoq.
Qineqqusaarnermi partiit assigiinnginnerat ersissaaq, anguniakkaminnillu qineqqusaaruteqassallutik. Tassa tamat oqartussaaqataanerat. Inuit Ataqatigiit qineqqusaarnerup nalaani qinersereerullu kingorna oqaloqatigiinnissamut sapinngilagut piareersimavugullu, nunarpummi inuilu pillugit suleqagiittariaqarpugut.
Inuit Ataqatigiit sinnerlugit
Mariane Paviasen Jensen
Inuit Ataqatigiit Inatsisartuni politikkikkut oqaaseqartartoq.
