Siullermiik Nunaqarfinnut aqutsisunut qinersinerup kingorna qinikkat nutaat arlaqarput, nunaqarfiimmi aqqaniliusuniΒ qinikkatut sulissalluta qilanaarsimaqaagut, piffissarli imaalivoq qinikkatut suli pikkorissartinneqanginnerput akuerisinnaangilara.
Innuttaasut sinnerlugit qinikkatut ilisimasariaqaratsigu qanoq kommunitsinni ingerlatsisoqarniarnersoq, sinaakutit suunersut, atorfilittat ataatsimiititaliat saaffigisinnaasagut sattalluta ujartuisariaqartarpugut, suliassat pingaaruteqaqisut qinikkatut ingerlanniarnerini, minnerungitsumillu ukiumut 2026- imut missingersuinermi nunaqarfiit aqqanillit malinnaatinneqanginnerput mamianarpoq. Aningaasatigummi qanoq sumiiffinni sinaakuteqartinniarneqarnerluta ilisimanngilarput.
Pingaarnersuinermi sumiiffiit anguniagaannik ujartuisoqangimmat ataatsimiititaliat arlaanaalluuniit qisuariarfigingimmatigut, misiginarpoq ukiorpassuarni nunaqarfimmi aqutsisuni nammineernerinissarputΒ suliniutaasimasuni qimalluinnarneqarsimasoq,Β una eqqaasangikkaani nammineq aqutsisut aqutassaat konto tassatuaamat ilisimasarput, taamammat pisariaqaqaaq nunaqarfiit qinigaaffigut qanoq aningaasatigut sinaakusersugaanersut balance/ kontut minnerpaamik ilisimassallugit, uggornarporlu qinikkat nutaat neriuffigisimagaluaqigatsigit missingersuusiorneq sioqqullugu nunaqarfiit innuttaasullu tikinneqanginneri, peqataatitsinerunissarmi qineqqusaarnermi anguniakkat pingaartut ilaginikuugaluarmassuk.
Nunaqarfinnilu allaffissornikkut sullissinermi pisariaqarteqaarput atorfilittat eqaatsumik innuttaasunik aamma sullissinissaanik malinnaatinneqarnissaat, ikiuukusuppugut namminiussuseqarnerulluta ingerlatsinissatsinnut aamma allaffissornikkut innuttaasut sullinneqartut eqqarsaatigalugit, taamaamat Kommune Kujallermi nunaqarfimmi Aqutsisuni ilaasortatut kissaatigaara qulaani taakkartukkakka allorarfigineqartariaqartut torersumik ingerlatinissaq angujumallugu.
Qassiarsummi Narsarsuarmi Igalikumilu
Nunaqarfinni Aqutsisut siulittaasuat; Mouritz Karlsen
Inuit Ataqatigiit
