Qassimiuaarneq maanna qaangiuppoq, aaqqissuussaq neriunarluartoq. Inuit, partiit allallu susassareqatigiit naapiffiat. SIK qujaffigerusuppara taamatut aaqqissuussineranut, qilanaarlutalu tullissaanut periarfissatsialaammat inuit qanimut naapillugit, oqallinnerillu ingerlatissallugit inuit akornanni.
Pingaaruteqarsoraarali uku eqqaassallugit. Sulisartuugutta atorfiliuguttalu tamatta Kattuffeqarnissamut kiffaanngissuseqarpugut. Kattuffimmik toqqaasarpugut suliffitsinni illersuisussatut tunuliaqutigiumallugit. Suliffimma eqqortumik akilertarneraanga, suliffimma naleqquttumik suliassittarneraanga, suliffimmalu peqqinnissara pingaartinneraa Kattuffimma isumaqatigiinniarnikkut isumannaarniarsarisaqarpaa. Taamaanngippat Kattuffimmik allamik toqqaasinnaaninnut pisinnaatitaaffeqarpunga.
Uanga sulisartutut Kattuffimmi siulittaasuma sinnerlunga politikkimut aalajangersimasumut tapersersuisunngortissanngilaanga, aamma uranimut angertunngortissanngilaanga.
SIK Qassimiuaartitsinerani peqataasutut ersarissumik misigaara sulisartut partimut aalajangersimasumut uranisiornissamullu tapersersuisutut aqqutissiuunneqartut.
Nunani aatsitassarsiorfiusuni aatsitassarsiorfinni sulisut Kattuffeqartarput siuttulimmik isumannaatsumik, akilussinnanngitsumik peqqissutsimikkullu illersuisunik.
Qassimiuaarnermili SIK’p siulittaasuata qaaqqusimavai uranitalinnik aatsitassarsiornermik illersuisut. Qaaqqusaani amigaatigaakka sulisartunik illersuisut. Sulisartut suut mianersorfigissaneraat, qinngornernut ulorianartunut qanoq illersorneqarnersut, peqqissutsimikkut qanoq illersorneqarneranik oqaluttuartussanik maqaasisaqarpunga. Maqaasivara siulittaasoq ilaasortamik illersuilluni pingaartitsisoq. Maqaasivara siulittaasoq partinut pituttorsimanngitsoq. Maqaasivara siulittaasoq qinngornerit ulorianartut ulorianassusaannik paasinnittoq aamma uranisiornissamut mianersoqqusisoq. Maqaasivara siulittaasoq sulisartut kinguaavisalu peqqissuunissaannik aqqutissiuiumasoq.
Tupigusuutigilluinnarparalu qinngornerit ulorianartut, urani, uloriananngitsuunerarlugit siulittaasoq oqariartuuteqarmat, allaat uranisiorneq qorsuunerarlugu oqariartormat. Tassa nunarsuarmut avatangiisinut mingutsitsinngitsuunerarlugu oqalummat.
Sulisartut, suliffissaaleqisullu suliffissaannik kissaateqaraanni pingaarluinnarpoq suliffinnik inuianni akisussaaffilinnik, peqqissutsimik akisussaaffilinnik akiluttortitsinngissamillu suliffinnik kissaateqarnissaq.
Sulisartoqarnermitoq nammineq politikkikkut isumaqarsinnaaneq, isummersorsinnaaneq, minnerunngitsumillu sulisartutut illersorneqarneq ineriartortinneqarili.
Mimi Karlsen
Inatsisartuni ilaasortaq
Inuit Ataqatigiit
