Asii Chemnitz Narup, Inatsisartunut ilaasortaq aningaasaqarnerlu pillugu oqaaseqartartoq:
2023-mut aningaasanut inatsisissatut siunnersuut partiinit isumaqatigiinniutigineqarnissaminut oqallisigineqarnissaminullu piareerpoq. Ukioq manna aappaagulu amigartoortoqartussaagaluartoq ukiunilu aggersuni annikitsunik sinneqartoortoqartussaagaluartoq, aningaasanut inatsisissatut siunnersuut siunissamut pinngitsoorani nalorninartorsiuffiusussarujussuarmut unammilligassaqarfiusussamullu suliaavoq.
Inuit Ataqatigiit aningaasaqarneq pillugu oqaaseqartartuat, Asii Chemnitz Narup tassunga atatillugu oqarpoq:
-Naalakkersuisut aningaasaqarnermut inatsisissatut siunnersuut akiliisinnaassuseqarfiusoq attanneqarsinnaasorlu saqqummiuppaat, partiillu aningaasanut inatsit piffissami aggersumi oqallisigissavaat isumaqatigiinniutigalugulu. Inuit Ataqatigiit tamanna qilanaaraat.
Asii Chemnitz Narupili nangilluni oqarpoq:
-Qularutissaanngilaq aningaasat naleerukkiartornerat taamaalillunilu ikummatissat inuussutissallu akiisa qaffakkiartornerat Kalaallit Nunaanni piffissami aggersumi ajornartorsiutaagaluttuinnassasoq. Aamma silaannakkut angallanneq takornariaqarnerlu ikummatissat akiisa qaffakkiartornerisigut piffissami aggersumi sunnerneqariaannaapput. Nunarsuarmi aningaasaqarneq Nunatta aningaasaqarniarneranut sunniuteqartarpoq, nuunarsuarmi tamarmi aningaasaqarneq avissaartinneqarsinnaanngilaq. Tamanna ukiuni aggersuni aningaasaqarneq pillugu politikkitsinni suli sillimaffiginerusussaassavarput, isiginiarlugulu.
-Nunarsuarmi amerlasuunik ataatsikkut atuuttunik ajornartoortoqarpoq: Ukrainemi sorsunneq, aningaasat naleerukkiartornerat, inuussutissanik amigaateqarneq, nukissiuutitigut ajornartoorneq aamma aningaasaliinissamik pisariaqartitsinerit annertuut soorlu mingutsitsinngitsumik nukissiuuteqarnissamut ikaarsaarnissamut, aamma illersornerunissamut isumannaallisaanerunissamullu. Ajornartorsiutit taakku tamarmik assigiinngillat, taamaattorli ajornartorsiutit imminnut atasutut ipput Kalaallit Nunatsinnilu ukiuni aggersuni sunnissagaatigut ilimagisariaqarparput.
-Peqatigitillugu Kalaallit Nunatsinni ajornartorsiutigut ilisimaneqartut aaqqinneqarnikuunngillat, attasssisinnaanermut ajornartorsiut, Inuit Ataqatigiinniillu Naalakkersuisut Attassisinnaanermut Ineriartortitsinermulllu pilersaarutaata II-p ilimasaarutigineqarnikuusup aaqissuusseqqinnissanik pisariaqartunik siunnersuusiorfiusussap isummerfiginissaa aamma qilanaaraarput, Asii Chemnitz Narup naggasiivoq.
