Kommune Kujalliup nittartagaatigut Borgmester Malene Vahl Rasmussen Pipaluk Jakobsen Larsenimut akissuteqarluni allagaani, Borgmesterip oqarnera; ”ukiuni kingullerni aningaasanik aqutsinerluttoqarsimasaneranik oqariartuuteqaruma kukkusumik paasissutissiinermik oqariartuuteqarnerarneqarsinnaanngilanga” paatsuuinertut isikkoqarpoq.
Oqanngilagut Borgmesteri kukkusoq. Innuttaasunilliuna ataatsimiisitsinermi oqartarami ukiuni kingullerni, aningaasanik aqutsinerluttoqarsimaneralugu, uani uagut pivarput, innutaasunik ataatsimiisitsinermi aningaasakilliorneq eqqaaneqartillugu, qinikkat qiningaaffimmi kingullermi aningaasanik aqutsinerlussimanerarlugit taakkartuisoqarnera eqqunngitsutut isigigatsigu. Naluneqangitsutummi Kommune Kujallermi aningaasaqarneq ukiuni kingullerpassuanngulersuni Kommunejussuangornerup kingornali, ammuinnavik ingerlasimavoq, tamannalu ersersinniarneqarani. Pitsaasimassagaluarpoq taama borgmesteri oqalunniaruni Kommune Kujallermi kisitsisit eqqortut atorlugit innuttaasunik takutitsisariaqartoq, soorlu ukiuni 2009-2024-ip iluaniittut, paasissutissat paasiuminartut statistik atorlugit innuttaasunut saqqummiunneqartuuppata, taamaasilluni qangarpiaq aningaasarliorneq aallartissimanera ersarissumik saqqummissagaluarmat.
Kiisalu Nanortallip atuarfia pillugu Borgmesteri akissummini allappoq, Pipaluk Jakobsen Larsen oqarsimasoq Nanortallip atuarfia matoqqanerarlugu, tamanna ilumuunngilaq. Allakkani ima allassimammat; “ Nanortallip atuarfia oqoqarpoq, suli iliuusissat ersarissut pilersinneqanngillat naak siunnersuuteqarsimagaluarlunga Naalakkersuisunut saaffiginnittoqassasoq. Ukioq naalluinnalerpoq neriullunga siunissami atuarfimmik innuttaasut toqqissisimanartitaannik atuarfeqalerumaartoq.” Atuartitsinermi ilungersunartumik ingerlavoq, atuarfiuniartoq najorneqarsinnaanani. Tamanna isiginngitsuusaarneqarsinnaanngilaq.
Borgmester Qaqortumi innuttaasunik ataatsimiisitsinermi ersarivimmik oqarnera, Nanortalimmi katsorsaanerit ingerlanngittut, ersarissaatigerusunnarpoq katsorsaanerit ingerlammata. Aammalu angajoqqaanngorlaanillu MANU sullissineq ukiuni kingullerni ingerlasimannginneragaanera tamanna aamma eqqortuungimmat, ukiuni arlalinni atorfik atorfigineqarpoq aammalu angajoqqaangortussanut MANU aqqutigalugu ingerlalluni.
Maanna aningaasatigut killiffitsinni imaannaanngeqisumi, qinikkatut isumatuumik tunngaveqarluartumillu aqutsinissap pingaaruteqarluinnarfiani, pingaaruteqarpoq suleqatigiinnerup pitsaasumik ingerlanissaa.
Taamammallu Kommune Kujallermi qinikkatut piumasarissavarput, Borgmester Malene Vahl Rasmussen avammut saqqummiussigaangami paasissutissanik tamakkiisumik eqqortunik innuttaasunut paasissutissiisassasoq.
Minnerunngitsumik ulloq 25.11.25 kommunal bestyrrelsemi ilaasortaq innuttaasumit saaffigineqarnermi kingorna Nanotalimmi væggelusit ajornartorsiutaangaatsiarmata ajoraluartumlluk pisortat suliffeqarfiini tuniluunneq annertooq piummat, suli ulloq manna tikillugu Kommunetsinni qisuariartoqanngimmat eqqumaffigeqqqullugu.
Inuit Ataqatigiit Kommune Kujallermi Kommunalbestyrelsemi ilaasortaat sinnerlugit
Gruppeformand
Ivalo Motzfeldt
Narsaq
