Inuit Ataqatigiit: Kommune Kujallermi innuttaasut ilisimatinneqartariaqarput

Inuit Ataqatigiit: Kommune Kujallermi innuttaasut ilisimatinneqartariaqarput

Kommune Kujallermi 2027-mut missingersuutit pillugit ullumi sapaammi Kommunalbestyrelsi ataatsimiisinneqarpoq. Ataatsimiinneq minutsit 27-t missaat sivisussuseqarpoq. Siumut aamma Demokraatit missingersuutit siullermeerneqarneranni akuersipput. Inuit Ataqatigiinniit tamanna tusaatissatut tigusimavarput.

Ataatsimiinnermi missingersuutit pillugit paasissutissat pisariaqartut saqqummiunneqanngillat: kisitsisit, anguniakkat, suliallu ingerlaartut pillugit saqqummiisoqanngilaq, ilanngussanillu tunuliaqutaasunik peqanngilaq. Missingersuutit qanoq tunngaveqarlutik suliarineqarsimanersut paasiniaqqissaarfigisinnaasimanngilarput.

2027-mut missingersuutini isertitat 769,3 mio. koruuninut, ingerlatsinermullu aningaasartuutit 720,3 mio. koruuninut naatsorsorneqarput. Ukiunili aggersuni 46,9 mio. koruuninik sinneqartooruteqartarnissaq naatsorsuutigineqarpoq. Kisitsisit eqqortuunngitsut paasineqarpoq. Siumukkormiut kisitsisit eqqortut piaartumik saqqummiunneqarnissaat piumasaraat.

Aningaasaqarnermut pisortaqannginnerput tunngavigalugu missingersuutinik paasissutissartaqanngitsunik saqqummiussisoqarnera akuerisinnaanngilarput. Kommunaldirektøri naapertorlugu sulisut ikililerneqarsimanerat suliat kingusissumik ingerlanneqartarnerannut kukkuneqarsinnaanerannullu pissutaavoq, missingersuutinillu suliaqarnermi Kommuneqarfik Sermersuup ikiuuttariaqarsimavaatigut. Aningaasaqarnermut pisortaqannginneq sipaarniarnermik tunngaveqanngilaq, taamaattumillu utoqqatsissutitut atorneqarsinnaanngilaq.

Nunaqarfinnut aningaasaliissutit aatsaat septembarimi akuersissutigineqarput. Nunaqarfinni aqutsisut aningaasaliissutit pillugit siusinnerusukkut arlaleriarlutik paasiniaasaraluarput, akineqartarnatilli. Nunaqarfiit pisariaqartitaat pillugit paasissutissat kingusinaartumik saqqummiunneqartarnerat akuersaarneqarsinnaanngilaq.

Kommunalbestyrelsimi ilaasortatut kommunip aningaasaqarnerata killiffianik ilisimatinneqartanngilagut, pingaarutilinnilu aningaasarpassuarnik naleqartuni aalajangiinerni peqataatinneqartarnata. Tamanna innuttaasut sinniisaattut akisussaaffitsinnut naapertuutinngilaq.

Kommune Kujallermi pissutsit ilungersunartutut isigaarput. Kommunip aqunneqarnerani pissutsit torinngitsut atuupput, kommunillu aqunneqarneranut inatsimmik unioqqutitsisoqartartoq isumaqarpugut. Inuit Ataqatigiit tamanna qatsuppaat. Innuttaasut soqutigisaat illersorniarlugit, pissutsit pillugit avammut erseqqissumik oqaaseqartarnissarput pisariaqarpoq.

Kommune Kujallermi Inuit Ataqatigiit sinnerlugit ilaasortat
Ivalo Motzfeldt aamma Pipaluk P. Larsen