Aasianni Inuit Ataqatigiit 50iliineranut pilluaqquarput.
Aasianni Inuit Ataqatigiit Siulittaasoqqaajusup Aqqaluk Lyngep Aasianni ullorsiornermut atatillugu oqalugiaataa ullorsiornermi ikkupparput:
“Asasakka Aasianni Inuit Ataqatigiit asasakka ikinngutit, suleqatit, asasakka ataqatit.
Ullumikkorpiaq ukiut 50-it matuma siorna inuusuttorpassuit katersortarfimmi Qassimi katersuupput inissaq tamaat ulikkaarlugu. Inuusuttut ulloq taanna najuuttut 500 missaaniipput. Filmertitsivugut oqallilluta nipilersortoqarlutalu. Unnuk taanna politikkikkut suleqatigiiffik partiliornissamik siunertaqartoq ataatsimeersuarnikkut pilersinneqartoq tassaavoq Inuit Ataqatigiit. Ukiut marluk qaangiummata 21. november 1978 parti pilersinneqarpoq. Tassa aallateqqaarpugut Aasianni 1976-imi Kattuffillu pilersinneqarpoq 1978-imi. Ataatsimeersuarneq Nunatta sinneranut tutsiummat aalassatsitseqaaq.
Taamani inuusuttuusugut suleqatigiilluta angujumasagut annertoqaat : Inuiattut akuerineqarumavugut immikkullu nunatsinnik piginnittuunerput akuerineqaqquarput. Tamakku anguneqarput Nunarput 2009-mi Namminersulermat.
Inuit Ataqatigiit isumaqarpoq innuttaasugut tamatta ataqatigiissutut inoorusuttugut, inuttut atukkatigut naligiimmik atugassinneqartariaqartut naqisimanninnermullu akerliusut. Oqaaseq Inuit aamma naggueqatigiit Inuit ataatsimut taaguutigaat taamaattumillu naggueqatitsinnik qanittumik suleqateqarnissaq pingaartipparput. ’Inuit’ aamma taaguutigaarput inuiassuarnut tamanut taaguutaammat, kissaatigigatsigu inuiassuit nunarsuarmioqatigigut akaareqatigiillutik inooqatigiissasut.
Aasaq taanna aamma Aasivik 76 nuanneqisoq Narsami pisimavoq inuusuttullu mumisitsinerat aallarnisarneqarpoq tassanilu aalajangiunneqarpoq tullianik aasiveqarfissaq Aasianni aaqqissuunneqassasoq. Aasivik 77 Qullissani pisussaq uagut Aasianniit akisussaaffigileratsigu aasarnissaanut aaqqissuussilluta ulapissuataarpugut. Tassa nuannequtaa inuusuttorpassuulluta suleqatigiinnermik sungiusarpugut namminerlu kajumissutsimik suleqatigiinneq pilerpoq. Ullup nalliuttorsiorfiusup ingerlanerani aamma filmiliarititarput ’Aasivik 77 ’ takusinnaassavarsi. Aasivik 77 nipilersornikkut nutaaliorfik naapiffik takorannersoq.
Ullumikkut ingerlaaserput taamanikkumut naleqqiutissagutsigu allaanerujussuuvoq maanna partitut akisussaaffeqarpugut naalakkersuinikkut pingaarutilimmik. Suli aaqqitassat amerlaqaat inuillu ulluinnarni atugaasigut pitsanngorsaasariaqarneq kikkulluunniit takusinnaavaat. Massakkulli periarfissarpassuit aningaasallu nutaat saqqummerput EU-mut isumaqatigiissut piorsaanikkut aningaasarpassuarnik periarfissiissooq aammalu Nunatta illersornissaanut milliardilikkaanik aningaasaliiffigineqarnera atorluagassaavoq. Aasiaat Avannaata isaariaatut pingaarluinnartumik inissisimavoq danskillu immakkut alapernaarsuinerat Aasiaanniit aallaveqartariaqarpoq – amutsiveqarlutalu mittarfeqarpugut – Diskobugtillu raajaqarfissui illersugassaraagut avatitsinnilu angallanneq nakkutigineqartussaalluni. Aamma katsorna erngup nukiliorfissaq sananeqartussaavoq.
Aasiaat massakkut perfiarfissarpassuaqarpoq inuutissarsiorfinnik ataavartunik pilersitsinissamut Kommune Qeqertaliup aqutsisui utaqqiinnarnagit suliffiutillit piumassuseqarnerusariaqarput.
Ajuusaarpunga ullumi najuussinnaannginnama. Qujamasullunga eqqaasarpakka suleqativut suleqatigisimasavullu tamaqqinnaasa qutsavigerusuppakka. Aamma ikinngutivut toqukkut qimagussimasut eqqaanngitsoorsinnaanngilagut. Qujanarsuaq. Eqqumiitsuliortorpassuit nipilersortartullu – quitarimillu ataasiakkaarillammaat! Tamassi qujanaq. Najorusunnaraluaqaasi neriuppunga kingusinnerulaartukkut Aasianni qanoq iliuuseqarumaarluta. Ajunngikkisi. – Aqqaluk Lynge”
