Piffissami matumani imigassamik matusinerup innuttaasunut annertoorujussuarmik sunniuteqaleruttorfiani borgmesteri illoqarfitsinni takussaangilaq. Innuttaasut aatsaat taamak ersarittumik qanilaartumillu siuttoqarnissamik pisariaqartitsileruttorfianni, akisussaaffimmik tigusiniarluni suli iliuuseqartoqanngilaq.
Ulloq 07.10.26 nal 16:00 Kommunalbestyrrelse ataatsimiinissamut aggersarneqarnitsinni oqaluuserisassat piareersimanngitsulluunniit uissuumissutiginikuuagut. Taassumap kingorna Inuit Ataqatigiit piumasaringaluarparput kinguartitsisoqassasoq, ataqatigiissakkamillu ataatimiititaliat sulillutik aallartissasut noqqaassutigisimagaluarlutigut. Ullorlu manna tikillugu suli ataatsimiisitaliani sulisoqalinngilaq, naak borgmesteri kommune kujalliup facebookiatigut saqqummiisimagaluartoq ulapputtut, kisianni qinikkatut suliassanik suli tigusaqanngilagut.
Akisussaaffeqartumik aqutsinissaq qiteralugu qineqqusaarsimagaani taava taamatut takutitsinissaq pingaaruteqarpoq; aqutsilluassagaanni taava innuttaasunik peqateqarnissaq peqataatitsinissarlu pingaartinneqartariaqarpoq.
Imigassamik matusigallarnermi maanna sapaatip akunneri marluk sinnereerpagut, innuttaasunut oqallitsitsisoqareernerani allatigullu neqeroorutit ataavartumik ingerlanneqaraluartut , periusissiatigut ersarissumik suli innuttaasunik peqateqarluni sulianik ingerlatsisoqanngilaq.
Ulloq 7. oktober ataatsimeeriaraluarnermi inerniliuffiunngitsumi Inuit Ataqatigiinni oqaatigaarput matusigallarnerup kingorna ammaajartoqqilerneq aqutamik pinissaa kissatigalutigut, soorlu imigassat aalakoornartortallit immiaaqat siulliullugit ammaanneqaqqaarsinnaaneri. Tamatumani ilaatigut inuussutissarsiortut eqqarsaatigalugit tamanna eqqartorneqartariaqartutut suli isumaqarfigaarput.
Imigassamillu matusinermi aalajangernissami ajoraluartumik qinikkat tamarmik peqataatinneqarsimanngitsut aammattaaq paasinarsivoq.
Qinikkatut illua tungiliuttuulluni qinigaaffimmi uani apeqqutini pingaarutilinni aggersarneqartannginnerput amerlanerpaatigut peqataatinneqartannginnerpullu ajuusaarnartorujussuuvoq. Innuttaasunik sullisserusukkaluarluni saaffiginnissutigut akineqanngittarneri, oqaluuserisassanngortitagullu qisuariarfigineqartannginneri suliniarnitsinni ilungersunareqaarput assut.
2027-imut aningaasalinissamut isumaqatigiinniarnerit siullermeerneqareerput, kisialli sulineq ataatsimiititaliani suli annerusumik ingerlanngilaq. Novemberip naalernerani aappassaaneerinnittussaavugut, taamaattorli ataatsimiititaliat amerlanerit suli aallartinngillat. Tamanna ernumanartutut isigaarput. Suliassat imaanaanngeqimmata peqqissaartumik peqataatitsisumillu sulinissaq ujartorparput.
Qinigaafik manna ukiup aappaa avillugu ingerlasimalerpoq, qinikkatut nunaqarfiit illoqarfiillu innuttaasui qanimut ataatsimoorluta suli tikinneqanngilagut. Ataatimiititaliat kommuunitsinni suli angalanngillat. Borgmesteri nunaqarfinni suli ataatsimiisitsinngilaq, illoqarfinnilu ataatsimiisitsisarnerit amigaataapput. Inuit attaveqaqatigiittarfiisigut innuttaasunik paasissutissiineq naammanngilaq, qinikkatullu kipiluttunartarpoq tusagassiuutitigut, kommunellu facebook-iatigut taamaallaat paasissutissinneqartarneq.
