Kalaallit Nunaanni pinerluttulerinermut inatsisip aamma Kalaallit Nunaanni eqqartuussisarnermut inatsisip allanngortinneqarnissaannut siunnersuut, L 97, 6. februaari 2024 siullermeerneqarneranit
Aaja Chemnitzip oqaaseqaataa – oqaatsit atorneqartut atuupput
Qujanaq. Meeqqanik kinguaassiuutitigut innarliineq akuerineqarsinnaanngilluinnarpoq, Inuit Ataqatigiinnullu nunatsinni meeqqanik kinguaassiuutitigut innarliinernik pinaveersaartitsinerup salliunneqarnissaa pingaaruteqarpoq.
Naalakkersuisut suliassaqarfimmi pingaarnersiuisimaneranut naalakkersuisut tusarnaarsimammata, Danmarkimilu digitalimik innarliinernut akiuiniarluni inatsisip atuutilerseqqammerneranni inatsisissatut siunnersuut manna aallartinneqarsimammat nuannaarutigaarput. Danmarkimi inatsisip atuutilersinneqarnerata kinguninngua Kalaallit Nunaanni inatsimmik tuaviortumik nutarterineq isumaqarpugut aalajangiisuusoq, tamannalu nalinginnaalertariaqarluni, tamatumunngalu naalakkersuisut nersorusullutigit. Kisianni aamma maluginiarparput inatsisinik atuutsitsinermut suliassaqarfimmi Naalakkersuisut pingaarnersiuisimanerisa, immaqa oqaraanni, suliarineqarnerisa sukkassusaat naammattumik salliunneqarsimanngitsoq. Taamaammat immaqa isiginiarneqartariaqarpoq Justitsministeriami Kalaallit Nunaannik salliussinissamik nukissat naammannersut.
Kalaallit Nunaanni pinerluttulerinermut inatsimmi allannguutit inatsisissatullu siunnersuutip nassatarisai tapersersorpavut. Meeqqap 15-it inorlugit ukiullip inersimasunik kinguaassiutitigut atoqateqarnissamik akuersisinnaannginnerat, tamatumanilu inuk 22-it sinnerlugit ukiulik meeqqamik 15-it inorlugit ukiulimmik kinguaassiuutitigut atoqateqarsimappat pinngitsaaliinertut isigineqartalernissaa pillugit aalajangersagaq Naalakkersuisunit immikkut saqqummiunneqarpoq. Tassunga atatillugu inatsimmik allannguutit pillugit nalinginnaasumik paasititsiniaanissap qulakkeerneqarnissaa pingaaruteqarsinnaavoq.
Ilutigitillugu maluginiarneqartariaqarpoq eqqartuussinermik suliaqartut arlaqartut inatsisilerinermik ilinniagaqanngimmata. Nunatta illersuisuunerata Nunattalu eqqartuussisuunerata allannguutit ullumi suliarisatta nassatarisaannik suliat pisariunerulernissaannut atatillugu ernumassuteqarnertik oqaatigisimavaat. Suliat akuerisamik illersuisunut inatsisilerinermik ilinniagaqanngitsunut ajornartorsiortitsissajunnarsipput, tamannalu eqqartuussinermi isumannaallisaanikkut ajornartorsiutaalersinnaavoq, taamaammallu suliat taakku suliarinissaannut inatsisillu pisariuneranik paasinninnissamut eqqartuussinermik suliaqartut naammattumik piginnaasaqarnissaat qulakkeerniarlugu illersuisussanngortitsisarnermut inatsisit misissorneqarnissaat qulakkeertariaqarparput.
Inatsisissatut siunnersuummik aamma tapersersuisunit Enhedslistenimit inuulluaqqussut anngukkusuppara, taamatullu oqaaseqarlunga inatsisissatut siunnersuummut saqqummiutipallanneqarsimaneranullu Inuit Ataqatigiit qujassuteqarput. Qujanaq.