All. : Aqqa Samuelsen, Inuit Ataqatigiit, Isumaginninnermut meeqqallu pillugit oqaaseqartartoq.

Utoqqartatta atugarissaarluarnissaat sulissutissaavoq

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen-ip kingullertigut tusagassiutitigut utoqqalinersiaqarneq pillugu saqqummiussai uissuumminartortaqartut isumaqarpugut.

Inuiaqatigiit ukiorpassuarni suliffeqarfinni suliffinnilu timi atorlugu suleruluffiusuni sulisimareerlutik, inuiaqatigiillu ullumikkut killiffiannut annertuumik timertik atorlugu tunniussaqareerlutik eqqissillutik utoqqalinersiaqarnissamik naatsorsuuteqarsinnaasariaqarput.

Inuit Ataqatigiit utoqqalinersiat atugarissaarnikkut ikiorsiissutitut isigaavut, kikkullu tamarmik toqqissisimasumik utoqqalinerminni inuuniuteqarsinnaanissaannut qulakkeerinnittussatut isigaavut. 

Nunatsinni utoqqalinersiallit inuttut ataqqinassusilimmik kikkut tamarmik inuuneqarnissaannik tunngavissiilluta annertussutsikkut inissiisariaqarpugut. Nunani avannarlerni allani pissutsinut annertunerusumik sanillersuunneqarsinnaasunik periarfissiisariaqarpugut.

Tamaammat tunngaviusumik utoqqalinersiat pisariaqartitsinerpaanut kikkunnullu tamanut atuuttumik aaqqiinissaq Inuit Ataqatigiit sulissutigissavaat.

Utoqqalinersiaqarneq pillugu Inatsisartut inatsisaata allanngortinneqarnissaa ukiaq manna Inatsisartuni aajangiiffigisassarput utoqqarnut suliffeqartunut taamaallaat pitsanngorsaataassaaq, utoqqarnulli suliffeqanngitsunut annertunerusumik malugineqartussaanani. 

Siunissaq ungasinnerusoq eqqarsaatigalugu siunnersuut tamakkiisumik utoqqarnut tamanut iluaqutsiinngilaq. Tamannalu pillugu Naalakkersiuisut kaammattorusuppagut qiningaaffimmi uani utoqqalinersiaqartarneq pillugu siunnerfimminnik nassuiaaqqullugit. Aammalu aningaasartalernissaanut ajornartorsiuteqarunik unneqqarissumik inuiaqatigiinnut paasissutisseeqqullugit. 

Inuit Ataqatigiit nalornissutiginngilarput nunatsinni utoqqalinersiallit amerlasuut inuuniarnikkut atugassarititaasut oqinnerit ujartorlugit  nunarput qimattariaqartaraat, tamannalu nunatsinni aningaasat kaaviiaartinneqartussaagalugit annaaneqartarneranit kinguneqartarpoq, kinguneraalu aamma ilisimasat nunatsinniikkunnaartarnerat minnerunngitsumillu ilaqutariittut aviissaartoqartariaqartarluni.

Utoqqaat kisimiittut amerlasuut suli akissaatimikkut naammattunik naammattusaaripiloortartut amerlapput. Utoqqalinersiaqarneq pillugu Inatsisartut inatsisaata allanngortinneqarnissaa pillugu suliarinerani soorlu oqartugut, utoqqaat kisimiittut isiginiarneqanngippallaarput.

Taamaammat utoqqaat kisimiittut utoqqalinersiaqarnikkut ullumikkornit pitsaanerusumik inissinnissaat sulissutigissavarput.