Kommuneqarfik Sermersooq kommunit naligiissaaffigineqarnissaannut aappaagu 54 millioner koruuninik immikkut akiliuteqassasoq Aningaasaqarnermut, Nunamullu Namminermut Naalakkersuisup, Vittus Qujaukitsup, ullumikkut nalunaarutigaa.

IMMIKKUT 54 million kr.-it! Sermersuup kommuninut naligiissaarinermut atatillugu kommuninut allanut angisuunut pingasunut tunniussaasa 86 million kr.-it saniatigut. Katillugit 140 million kr.-it!.

Aamma Vittus Qujaukitsup isumaliutersuummini “Nalimmassaarinermik aaqqissuussinermik nutaamik assigiimmillu piusussaaffeqarfiusumik piareersaaneq pillugu piviusut”-ni Sermitsiami normumi kingullermi saqqummersumi, oqarsimavoq, tullinnguutissasoq Sermersuumi kommunalbestyrelsip akisussaaffik tigullugu, pisariaqartut malillugit sipaarniarnissaat.

Tamatumani Vittus Qujaukitsoq ilumoorluinnarpoq. Uagut akisussaaffigaarput kommunip karsiani putup matunissaa, tamannalumi qularutiginngisaannarparput. Innuttaasut 6. august Ittoqqortoormiini, Tasiilami, Paamiuni, Nuummilu ataatsimiisinneranni erseqqissunik assersuusiorpugut, Sermersuumi tamarmi annertuumik sipaarniarnissap suna kingunerisinnaaneraa, innuttaasullu 22.000-it, inuussutissarsiutinillu ingerlataqartut tatisimaneqareersut qanoq eqqorneqarsinnaanersut – kommunip karsiani naatsorsuutigineqartutut putoq angisooq matussuserniarlugu.

Innutaasunik ataatsimiisitsinerit borgmesterinit allanit ersisaarinertut oqaatigineqarput. Piumagaanni qanorluunniit oqartoqarsinnaavoq. Tassami Sermersuumi sipaarniuterpassuit hundrede millioninik arlalinnik nalillit aarlerititsipput, ernumanarlutillu. Aamma tamanna Sermersuumi tamarmi atuarfeqarfinnut, meerartatsinnut, inuusuttunut, utoqqarnut innuttaasunullu inuuniarnermikkut nanertuuteqartunut Ittoqqortoormiini, Tasiilami, Paamiuni, Nuummi, nunaqarfitsinnilu 8-ni aarlerinassaqaaq.

Tamatumani kommuni kinaluunniit aningaasarsiornerminik oqimaaqatigiissaariniartoq, pinngitsaalineqartussaavoq annertuunik ilungersunartunillu sipaarniuteqarnissamut, tamannalu takusinnaassallugu inuiaqatigiinni aningaasarsiornermut professoriusariaqanngilaq. Pisorlu tamanut annernartussaassaaq.

Vittus Qujaukitsup allaaserisamini aamma oqaatigaa, Sermersooq sanaartornerminut imaluunniit allaffissornerminut sipaarniuteqaannarsinnaasoq.

Ajoraluartumik Vittus Qujaukitsup taama oqarnermigut takutippaa, qanoq Sermersuumi piviusunut, tigussaasunullu sianigisaqanngitsigaluni.

Tassami kialuunnit takusinnaavaa, taama annertutigisunik sipaarniuteqartoqarsinnaanngitsoq, innuttaasunut ajorluinnartumik kinguneqanngitsumik. Kisianni tassa Sermersuumi inuuttaasut Nuummi, Paamiuni, Tasiilami, Ittoqqortoormiini, nunaqarfitsinnilu 8-ni kisimik sipaarniarneq malugisussaanngilaat. Nakkariarneq Kalaallit Nunaani innuttaasut tamarmik malugisussaavaat. Sipaarniarnerit ima annertutigisussaapput, allaat Sermersuup Kalaallit Nunaanni aningaasarsiornermut ineriartortitsivittut inissisimanera navianartorsiortussaalluni.

Inuulluaqqusilluta

Mille Søvndahl Pedersen, Naja Lund, Storm Ludvigsen, Uju Petersen, Allan Pertti Frandsen, Iddimanngiiu Bianco, Charlotte Pike, Asii Chemnitz Narup

Inuit Ataqatigiit kommunalbestyrelsemi ilaasortat, Kommuneqarfik Sermersooq.

Attaveqarfissat:

Mille Søvndahl Pedersen, Kommunalbestyrelsemi alaasortaq, Aningaasaqarnermut Ataatsimiititami ilaasortaq, Kommuneqarfik Sermersooq, Mobil +299 482103, misp@sermersooq.gl

Allan Pertti Frandsen, vicegruppeformand og medlem af Anlægs- & Miljøudvalget, Mobil +299 598755, apfr@sermersooq.gl