All.: Mimi Karlsen, siul.tullia. & Sofia Geisler, ilaas., Nunanut Allanut Sillimaniarnermullu Ataatsimiititaliaq

Uggornarpoq peqqusiileqinarlunilu

Nunanut Allanut Sillimaniarnermullu Ataatsimiititaliami Inuit Atataqatigiit ilaasortaatitaasa Qallunaat Nunaata Nunanut Allanut Ministeriata ataatsimeeqatiginngitsoorneranik ataatsimiititaliap siulittaasuata ajuusaarnera uggorsarneralu paasilluarpaa.

Nunanut Allaanut Sillimaniarnermullu politikki Nunatsinni partiit tamarmik tunuliaqutsigaat qanoq pingaaruteqartigisoq Inuit Ataqatigiinniit arlaleriarluta oqariartuutigisarparput. Tamannami pinngippat nunanut allanut sillimaniarnermullu tunngasut allat avatitsinniit aqussavaat, taamaattoqarneranilu naatsorsuutigiuaannarsinnaanngilarput nunatta soqutigisaasa salliutinneqarnissaat.

Taamaattumik uagutsinnut uggornaqaaq piffissaagallartillugu Naalakkersuisut ataatsimiititaliamut ilisimatitsisimanngimmata ataatsimeeqatigiinnissarlu inissillugu. Peqqusiileqinarpoq Inatsisartut ataatsimiititaliaannut, politikkikkullu aqutsinermut tamarmut, isiginninneq innarlerneqartoq takusinnaallugu. Ajuusaarnaqaaq.

Pissusissamisuussaaq erseqqissaatigissallugu Nunanut Allanut Ministerip Nunatsinnut tikinnissaa ullut marluk sioqqullugit ataatsimiititaliamut ilisimatitsissutigineqarmat, ataatsimiititaliamilu ilaasortat amerlanerit ataatsimiititaliat allat ilaasortaaffigisamik Nuup avataani ataatsimiinnerat pissutigalugu Nuummiinngillat, Nunanullu Allanut Ministerip ataatsimeeqatiginissaani piumasaqaataavoq ornigulluni najuunnissaq.

Nunanut Allanut Nukissiuuteqanermullu Naalakkersuisup ilisimatittariaqarpaatigut Nunanut Allanut Ministerip tikeraarnissaa qanoq sivisutigisumik siuningaaniit ilisimareersimanerlugu, aammalu tikinnissaa ullualunnik sioqqullugu ataatsimiitsitaliamut ilisimatitsineq sumik pissuteqanersoq.

Share and Enjoy !

0Shares
0 0 0