Ukiut tallimassaat ataannartumik nunatta politikikkut aqunneqarnera patajaassuseqarsimanngilaq. Tamanna arlaannaannulluunniit iluaqutaanngilaq. Inuit Ataqatigiit patajaassuseqanngitsumik ingerlatsinerup nanginnissaa ilaaffiginiarunnanngilarput.  Isumaqatiginninniarnernulli aggersarneqassagutta soorunami aggissaagut.

Qaammatit sisamaannaat matuma siorna naalakkersuisooqatigiinnissaq pillugu Siumut kingullermik isumaqatiginninniaqatigivarput. Taamanikkut massakkullu Siumumi aqutsilluartoqarsorinngilarput. Partiip iluani assortuuttoqarpoq eqqissiviilliorfiujuarlunilu. Tamannalu ajornartorsiutip qiteraa, pissutsillu taamaannerat pissutigalugu naalakkersuisooqataalernissamut pilerinngilagut.

Takusagut naapertorlugit Kim Kielsen kisermaassilluni, akuliutsitsinani, ataqatigiissaarinanilu aqutsivoq, naalakkersuisooqatiminik attaveqarniartuunngilaq minnerunngitsumillu tunuliaquttaminik ataatsimoortitsinnaassuseqarani. Tamakku 2016-2018-mi naalakkersuisooqataanitsinni uatsinnut ajornartorsiutaasimasut Naalakkersuisooqataaleraluartunut ingerlaqqiinnarsimarpasipput.

Aqutseriaatsimut taamaattumut ilanngunnissarput kissaatiginngeqaarput.

Maanna pisut, naalakkersuisooqatimini inatsisartuniluunniit tunuliaquttaminik qulakkeerinneqqaarsimanani danskit ministeriunerannik tikittuulerneq, akuerineqarsinnaanngitsumik aqutsinerlulluinnarnermik takussutissaavoq.

Taamaammat isumaqatiginninniarnernulluunniit takkukkaluarutta naalakkersuisooqataaleriaannaanitsinnik ersiutaanngitsoq erseqqissassavarput.

Sara Olsvig
Inuit Ataqatigiit siulittaasuat