Inatsisartuni Aningaasaqarnermut Ataatsimiititaliami IA-p sinnerlugit ilaasortaatitaaniit Hans Aronsen, Kuupik V. Kleist aamma Naaja H. Nathanielsen

Nuannaarutiginngivillugu ataasinnornermi 25. august Qanorooq isiginnaarparput. Allaallu upperiuminaatsillugu. Aningaasaqarnermut Naalakkersuisup 2015-imut aningaasanut inatsisissamik saqqummiineraniit ullut arfinillit qaangiutiinnartut parteeqataanit isornartorsiorneqarpoq. Ataasiinnaanngitsumit kisiannili parteeqataasa PINGASUT aningaasanut inatsissaq akerlilerpaat. Tamanna arlalinnik pissuteqartumik maluginiagassaavoq.

Isornartorsiuisut marluk Inatsisartunut ilaasortaapput. Taakku aningaasanut inatsississatut siunnersuummut akerliunerminnik nalunaarnersisigut, suliluunniit Inatsisartut ukiakkut ataatsimiinnerat aallarterianngitsoq naalakkersuisooqatigiit amerlanerussuteqarunnaarput. Naalakkersuisooqatigiit ataatsimoorsinnaarpasinnatik, qinikkatut ataasiakkaatut nammineq soqutigisaminnik aallussisutut saqqummernerat toqqissisimananngilaq. Imaappoq naalakkersuisooqatigiit politikkikkut sammiviat amerlanerussuteqarneralluunniit naatsorsuutigisinnaanngikkipput.

Aamma annertuumik maluginiagassaavoq isornartorsiuisut pingajuat NAMMINEQ Naalakkersuisunut ilaasortaammat – taamaalillunilu nammineq aningaasanut inatsisiliani isornartorsiormagu. Aalisarnermut Naalakkersuisup naalakkersuisooqatigiit aningaasaqarnermut politikkianni qitiulluinnartoq tupaallaatigerpasippaa.

Finn Karlsenip, Naalakkersuisut Nunatta Karsiani amigartoorutit aalisakkat tamaasa akitsuusernerisigut matussusernialersaaraat ilisimarpasinngilaa. Aningaasanut inatsisissaq atuaraanni immikkoortumi 4.2.1-imi aalisarnermik inuussutis-sarsiutini1 ersarikkaluarpoq, Naalakkersuisut ”sinerissap qanittuani aalisarnerup nutarternissaanik aallarnisaanissaq” kissaatigigaat, inuussutissarsiut imminut akilersinnaaneruleqqullugu aamma aalisakkat qaqinneqartut akitsuusersorneqarnissaannut nukissaqalersillugit. Taamalu pisoqarnissaata tungaanut aningaasat aalisarnerup sinneranit aaneqalersaarput. Taamaalillutik Naalakkersuisut missingersuutigaat 2016-imiilli aalisarnerup annertusisamik akileraarusiiffigigeqqinneratigut 15 millioner kr isertinneqassasut. 2017-imiit aningaasat taakku 50 millioner kr-nik2 ilaqqinneqassapput.

1) Qupperneq 92-imi qallunaatuuani

2) Konto 20.11.51

Eqqarsaatigigaanni Naalakkersuisut utikattuartumik oqartartut ”patajaatsumik aningaasaqarnikkut politikkeqarlutik” ilaatigut aalisarnerup iluani nutarterinernik tunngaveqartumik, eqqarsarnangaarpoq tamanna Aalisarnermut Naalakkersuisup tupaallaatigimmagu. Tassami akisussaaffia tassaammat Nunatta inuussutissarsiutaa pingaarneq.

Apeqqutaalerpoq nutarterinerit pilersaarutaasut piviusunngortinneqarnissaat naatsorsuutigisinnaaneripput, Naalakkersuisut tamarmiullutik tunuliaqutaanngippata. ANINGAASAQARNERMULLU Naalakkersuisup nutarterinissamik pilersaarutini saqqummiussai naatsorsuutigisinnaanngikkutsigit – taava Nunarput aningaasaqarnikkut suup tungaanut ingerlaarpa?

Inuit Ataqatigiit sakkortunerpaamik Naalakkersuisooqatigiinnut kaammattuutigaat, iluminni attaveqaqatigiinnertik annertuumik annertusaqqullugu, namminnerlu politikkikkut anguniakkatik takorluukkatillu erseqqissarluaqqullugit. Ataa-sinngormat unnukkut Qanoruumi ajalusoorneq isigalugu toqqissisimananngilaq. Naalakkersuisooqatigiit aningaasaqarnikkut politikki ataatsimoorfigivaat? Pissusiviusut malillugit maanna pineqartoq tassaanerluni ikinnerussuteqarluni naalakkersuisuutitaqarneq? Tamanna akissaqartinnerparput, eqqarsaatigigaanni qinikkat kikkulluunniit Naalakkersuisooqatigiit politikkiat illersussagunikku ”akilersissinnaalissasut”?

Uagut tungitsinniit isertunngisaannarparput isumalluutivut tamatta pigisatta akileraarusernissaat tunngaviatigut ajorinagu. Taamaattoq uagutsinnut pingaarluinnarpoq, akitsuusiineq Nunatta Karsiani amigartoorutit qanoq annertutiginerannik aalajangerneqassanngimmat, inuussutissarsiutilli pissusiviusut malillugit nammassinnaasai tunngavigalugit aalajangerneqarluni. Taamaammat siunnersuutigaarput akitsuutit nutaat ataatsimut isigalugit maanna aalisarnermit akitsuusiinikkut isertitaasartut qaffatsissanngikkaat. Isumaqatigiinniarnissat pissangalluta qilanaarivagut, piviusunngortinneqarsinnaasunillu oqareernitsitut siunnersuuteqarumaarluta. Nutarterisoqarnissaanik nutaanillu isertitaqarnissamik pisariaqartitsineq nassuerutigivarput, suliallu sukumiisumik aamma maanna pisut siunissarlu eqqarsaatigalugit ingerlanneqarnissaa qilanaaralugu.

Attavigisassaq Naaja H. Nathanielsen, mobil 54 89 81