Inuit Ataqatigiit Peqqissutsimut, Isumaginninnermut Inatsisinillu Atuutsitsinermut Naalakkersuisoq tatigiunnaarparput

Naalakkersuisup akiliutissamik kortimik tatigineqarluni atugassinneqarsimanermini mianersuaalliorluinnarsimanera Naalakkersuisutut atuunnissaanut naleqqukkunnaarsitsivoq.

Inatsisartut innuttaasullu Peqqissutsimut, Isumaginninnermut Inatsisinillu atuutsitsinermut Naalakkersuisup atorfimminut atatillugu korti biilit benzinamik orsernissaannuinnaq akiliissutaasartussap 2017-imi qaammatini arlalinni atornerlunneqarsimanera paasivaat. Kukkunersiuisut Naalagaaffimmit akuerisaasut Deloitte naapertorlugit atornerluineq Namminersorlutik Oqartussat aallaffeqarfiannit paasineqarpoq, taakkulu suliamut qisuariaateqarsimallutik. Kukkunersiuisup Naalagaaffimmit akuerisaasup bilagit misissorpai, maannamullu annertuumik atornerluisoqartoq inerniliivoq, taamatullu aamma aningaasat 6.855,45 kr-inik annertussuseqartut naalakkersuisoqarfiup sulisuisa naatsorsugaat utertillugit akilerneqarsimasut paasivaa.

Akiliutip sumut atorneqartussaanera paatsuugassaanngilaq

Ilanngullugu biiliunngitsunut kiisalu illoqarfimmi biilip sumiiffigisaanit allaanerusumi korti atorlugu orsiisoqartartoq ilanngullugu paasineqarpoq. Inuit Ataqatigiinnit ersarissumik oqaatigiumavarput Naalakkersuisutut ivertinneqarnikkut tamarmik paasitinneqartarnermikkut nalunngilluinnaqqissaartarmassuk kortimik tunineqarsimatillutik biilip orsussernissaanuinnaq atorneqartussaasut taavalu kortit pineqartut isumannaatsumik inissisimanissaat isumannaarsimassallugu, taamatullu kortimik tigummialik innuttaasunit Inatsisartuniillu tatigineqaqqissaarluni tigummiartitaasoqartarmat ersarissaatigissavarputtaaq.

Inuiaqatigiit aningaasaataannik paarsinerlunneq suusupaginninnerlu

Suliami matumani tatiginninneq innarlerneqartoq Inuit Ataqatigiit isumaqarput. Naalakkersuisut mianersuaalliornerata inuiaqatigiit aningaasaataanik paarsinerluttoqartoq takutippaa, tamannalu akuersaarsinnaanngilluinnarparput. Naalakkersuisunut ilaasortap akiliutissamik kortimik tatigineqarluni atugassinneqarsimanermini mianersuaalliorluinnarsimanera Naalakkersuisutut atuunnissaanut naleqqukkunnaarsitsivoq. Peqatigisaanik Naalakkersuisunut ilaasortap allanik pisuutitsiniarsinnaangitsoq isumaqarpugut, ingammik kortip pineqartup erseqqilluinnartumik siunertamut ataasiinnarmut, tassalu Naalakkersuisunut ilaasortap biiliata orsernissaanik siunertaqarluni atugassiaanera eqqarsaatigalugu.

Tamanna tunngavigalugu Inuit Ataqatigiit Peqqissutsimut, Isumaginninnermut Inatsisinillu Atuutsitsinermut Naalakkersuisumut tatiginnikkunnaarnermik taasititsissalluta matumuuna nalunaarutigaarput, paasinarsimmat Naalakkersuisut Siulittaasuata pisussaaffini malillugu suliaq naammassisinnaanngikkaa.

Sara Olsvig & Aqqaluaq B. Egede

Siulittaasoq & Siulittaasup tullia

Inuit Ataqatigiit