Innuttaasoq ikiorneqarnissaminut pisariaqartitsigaangat kommune pingaarutilimmik inissisimasarpoq. Innuttaasut nammineernissaannut ikiorsiisarnissaq pingaarnertut periuseraarput. Inuit assigiinngitsuupput, taamaattumillu assigiinngitsorpassuarnik iliuusissanik aallartitsisimavugut – taamaalilluta assigiinngitsutigut ikiorneqarnissamut pisariaqartitsinerit pitsaanerusumik iliuuseqarfigisinnaavagut.

Kikkulluunniit ajornartorsiuteqaleriataarsinnaapput. Assigiinngitsorpassuarnik pissuteqarsinnaavoq, inuiaqatigiittullu innuttaasut ikiorneqarnissaminnik pisariaqartitsisut ikiornissaat ataatsimut suliassaraarput. Pingaaruteqarluinnarporlu innuttaasup ikiorneqarnissaata aaqqissuunneqarnissaa, innuttaasup ikiorneqareernermi kingorna nammineersinnaalerniassammat.

Isumaginninnikkut ikiorsiissutit utaqqiisaasumik ikiorsiissutaasussaapput. Ikiorsiissutit ataavartussaanngillat taamaanngisaannarsimallutillu.

Periarfissat killissallu

Innuttaasoq eqqortumik ikiorneqarnissaanut neqeroorfigitinniaraangami kommune pingaarutilimmik inissisimasarpoq. Periarfissaqartugut periarfissagullu killeqartut paasinissaat pingaaruteqarpoq. Tassa aningaasaqarnermut tunngasut aamma inatsit malittassarput eqqarsaatigalugu. Taakkulu marluk imminnut periarfissatsinnullu assut sunniuteqartarput.

Sulineq imminut akilersinnaasariaqartoq isumaqarpunga. Tamannami aamma isumaginninnikkut inatsimmi tunngaviusumik siunertaavoq. Ikiorsiissutit sulinermi akissarsiarisinnaasaniit qaffasinnerulersissanngilagut. Taamaaliorutta innuttaasugut uninngaannartilissavagut, tamannalu kimulluunniit peqqinnanngilaq.

Aamma innuttaasut assigiinngitsumik pineqassanngillat, tassa imaappoq Tasiilamiinnaq aningaasaqarnermut tunngasut, soorlu isumaginninnikkut ikiorsiissutit akileraarutillu, allanngortissinnaanngilagut. Kommunimi tamarmik assigiissapput, taannalu inatsit kommunimi allanngortissinnaanngilarput.

Taava qanoq iliussaagut?

Kommune suliffeqarfinnik suliffinnillu pilersitsissanngilaq. Akerlianilli namminersortut suliffissanik pilersitsinissaminnik kissaateqartut atugaat pitsaasuunissaat qulakkeertussaavarput, tassungalu tunngatillugu Tasiilami suliniuterpassuit ingerlappagut.

Kommuneqarfik Sermersuup Tasiilami Inuussutissarsiornermut Siunnersuisoqatigiit pilerseqqammerpaa, tassanilu illoqarfimmi inuussutissarsiornermut Siunnersuisoqatigiinnik pitsaasumik oqaloqateqarsinnaaneq qulakkeerniarneqarpoq.

Illoqarfimmi Destination East Greenland, takornarialeriasut, kiffartuussinissamik  isumaqatigiissuteqarfiginikkut takornariaqarneq tapersersorparput.

Inuussutissarsiornermut Immikkoortortami piniartuunermiit aalisartuunermut ikaarsaariartortunik tapersersuiniarluni annertuumik suliniuteqarportaaq. Ukiuni kingullerni inunnut aalisarnermik inuussutissarsiuteqalernissamut soqutiginnittunut assigiinngitsutigut pikkorissaasoqartarpoq, allaat qaammat kingulleq soqutigisaqaqatigiit Tasiilami aalisarneq pillugu isumasioqatigiinnissamut aggersarneqarsimapput, tassanilu aalisarnermut periarfissat eqqartorneqarput.

Ukioq kingulleq Tasiilami suliffeqarfiit sulilernissamut piareersarfiusut, inuusuttunik sulilernissamut piareersarfiusut, pilersippaguttaaq.

Suliniutit taakku ataatsimut suliffissanik pilersitsinissamik anguniagaqartuupput, taamaaliornikkullu isumaginninnikkut ikiorsiissutit qimakkiartorneqassapput. Suliniutilli taaneqartut suliniutit pioreersut ilagiinnarpaat.

Isumaginninnikkut ajornartorsiuteqartunut neqeroorutit pitsaanerusut

Innuttaasut ilaat isumaginninnikkut ajornartorsiuteqarneq pillugu suliffissaaleqilertarput, tamatumunngalu allaqqinnaat eqqarsaatigineqartariaqarput. Assigiinngitsunik neqerooruteqareerpoq, missingersuutinullu isumaqatigiissummi nutaami Tasiilami neqeroorutaasut saniatigut 6 millionit koruunit aalajangersimasunut atugassatut immikkoortinneqarput, taakkulu immikkut ittumik tapersersorneqarnissaminnut pisariaqartitsisunut atorneqassapput.

Suliniutigut suli siammasissuussapput, qanorlu pitsaanerusumik iliorsinnaanersugut eqqarsaatigiuassavarput. Taamaalilluta innuttaasut pitsaanerpaamik iliuuseqarfigissavagut.

Meeqqat inuusuttullu qitiutillugit siunissamut ungasinnerusumut suliniuteqarneq

Qanittumi siunissaq ungasinnerusoq eqqarsaatigalugu suliniut “Tasiilami suleqatigiippugut” aallartipparput, taannalu suliniut ukioq kingulleq Sustainable Now suleqatigalugu aallartipparput. Suliniut ukiuni tulliuttuni arfineq-pingasuni ingerlassaaq, Tasiilamilu nunaqarfinnilu meeqqat inuusuttullu pitsaanerusumik inuunerminni atugaqarnissaat taamalu toqqissisimanerusumik piujuartitsinerusumillu alliartornissaat qulakkeerneqassaaq. Matumani innuttaasut namminneq isumassarsiaat nukiillu sulinermi tunngavigineqassapput. Tasiilamimi nukissat amerlaqaat, taakkulu atortariaqarput.

Suliniutit ilaanni massakkut pisut aallunneqartarput, allat, soorlu “Tasiilami suleqatigiippugut” sivisuumik ingerlanneqartussaavoq, taamaattumik suliniutini taamaattuni angusat ingerlaannaq takuneqarsinnaanngimmata naammagittarnissaq pisariaqarpoq. Oqaatigisinnaavarpulli angujartuaarlugu.

Inge Olsvig Brandt, Siulittaasoq, Suliffeqarnermut Isumaginninnermullu Ataatsimiititaq, Kommuneqarfik Sermersooq

Share and Enjoy !

0Shares
0 0 0