All.: Múte Bourup Egede, siulittaasoq, Inuit Ataqatigiit

Tamatta isumaqatigiissuteqarnerput Nunatta nunanut allaanut sillimaniarnermullu politikkianut aallaaviussaaq

Nunatta namminiilivinnissaa Inuit Ataqatigiit ilungersuutigiuarpaat, aamma inuit akornanni nammineq aalajangiisinnaassuseq aalajangeeqataanerlu annerusoq. Namminersornerup namminiilivinnerullu sulissutiginerannut ilanngullugu nunat tamalaat akornanni sunniuteqarnerulissaagut nammineq nunanut allanut politikkeqarnerput, tassunga ilaalluni sillimaniarnermut politikki, aqqutigalugu. Isummersornermi ataatsimoorussamik isumaqatigiissuteqarneq naleqqatut atorneqassaaq aalajangiisakkanilu Nunatsinnut aamma Issittoq pillugu nunanik allanik suleqatigiinnermut tunngasuni aalajangiisuussalluni. Uagut eqqartorneqassanngilagut peqataanngikkutta.

Qularutigineqassanngilaq Inuit Ataqatigiit eqqummaariffigilluinnarmassuk Nunatta issittumi inissisimanera, tassunga ilaalluni nunat eqqaamiorisagut eqqarsaatigalugit Nunatta pingaaruteqaleraluttuinnarnera. Inuit Ataqatigiit akisussaassuseqarnerminut ilisimaarinnilluinnarpoq, qaqugukkuugaluarpalluunniit pingaartitat aallaavigisagut tassaallutik akuutitsineq, ataqqeqatigiinneq, inuit pisinnaatitaaffiinik tunngaveqarneq nunamillu aqutseqataanermini uppernassuseqarluni inissisimasoq.

Nunatta soqutigisaanut akerliusumik Naalakkersuisooqatigiit suliaqarnerassallugit tunngavissaqanngilagut.

Taamaakkaluartoq tusagassiorfiit aqqutigalugit aasap ingerlanerani malinnaaffigivagut pisut arlallit, ulloq manna tikillugu Nunanut Allanut Nukissiuuteqanermullu Naalakkersuisumit ataatsimut isiginnittumik ulloq manna tikillugu naliliiffigineqanngitsut isummerfigineqaratillu.

Tusagassiuutitigut allaatigineqartut ilaat tassaapput nammineq piumassutsiminnik suleqataasunik pilersitsinissaq allaqqaammut inuit 120-it peqataaffigiligassaattut pilersaarutigineqartoq. Timmisartut malersuutit Danmarkimiit pisiarilersaarneqartut, taakkulu maannamut atorneqartunik timmisartunik malersuutiinut nutaanngilisunut taartaasussat ilaat Nunatsinni atorneqarsinnaalissasut miffissamut sikusimasumut missinnaanissaat pissutigalugu.

Issittumik nakkutilliinerup annertusarneqarnissaa siunertaralugu qallunaat Illersornissamut Ministeriata Nunanut Allanut Nukissiuutinullu Naalakkersuisumik aasap ingerlanerani oqaloqatiginninnera.  InterForce Grønland, Nuummi aallaaveqarluni illersornissaqarfiup kiisalu suliffeqarfiit namminersortut pisortanillu pigineqartut akornanni paaseqatigiilluni suleqatigiinnerup attaveqatigiinnerullu inerisarneqarnissaanik suliaqartussaq pilersinneqartoq.

Inuit Ataqatigiinniit naatsorsuutigivarput iliuuserineqartut tamaasa aallartisarneqarnissaannut piviusunngortinneqarnissaannullu Naalakkersuisut akuersisimasut. Taamaattumik aamma naatsorsuutigivarput iliuuserineqartut tamarmik Namminersorneq pillugu Inatsisip, kiisalu isumaqatigiissutit nalunaarutillu Itillimi, Igalikumi Ilulissanilu atsiorneqartut siunertaannik anguniagaannillu innarliinnginnerat Naalakkersuisut qulakkeersimagaat. Taamaattumik naatsorsuutigilluinnarparput Naalakkersuisunit aamma qulakkeerneqartoq Issittoq sakkulersorfiussanngitsoq    

Múte Bourup Egede:

  • Naalagaaffeqatigiinnerup iluani sillimaniarnermut tunngassuteqartut annertunerujartortumik Qallunaat Nunaanniit ukkatarineqalernerata pingaaruteqarnera paasivarput. Mannali tikillugu suli tusanngilarput Nunatta nunanut allanut politikkiata qanoq imaqartariaqarneranik Naalakkersuisut isumaat, tassunga ilaalluni sillimaniarnikkut politikki qanoq siunnerfeqassanersoq piffissaq qanittoq siunissarlu ungasinnerusoq isigalugu.
  • Nunanut Allanut Sillimaniarnermullu Nunatta politikkiata piaartumik inissinnissaa pingaaruteqaqimmat aammaarlunga Nunanut Allanut Naalakkersuisoq kaammattussavara partiinik oqaloqateqarnissamut qaaqquseqqullugu, taamaasilluni oqaloqatigiinnerit aallartissinnaaqqullugit. Iliuuseqanngikkutta nunanut allanut sillimaniarnermullu tunngasut allat avatitsinniittut aqussavaat, taamaattoqarneranilu naatsorsuutigiuaannarsinnaanngilarput nunatta soqutigisaasa salliutinneqarnissaat. Isumaqatigiissutigalugu nunanut allanut naqissusigassarput tassaavoq Nunarput eqqartorneqarsinnaasoq aaliangersaavigineqarsinnaasorlu aatsaat peqataagutta.

Share and Enjoy !

0Shares
0 0 0