Taksøep nalunaarutaa ajuallaatigiinnarnagu suliassartai nammineq suliariniartigit.

Naalakkersuisut partiillu Naalakkersuisuutitaqartut Taksøep nalunaarutaa imarisaatigut oqaaseqarfigivallaarnagu ajortussarsiorlutik nukitik atorpaat.

Inuit Ataqatigiit nalunaarutit oqariartuutai ilai soqutiginartippavut. Nunarput peqataatippiarnagu suleriaaseq atorneqartoq isornartorsioreerparput. Maluginiarparpulli Naalakkersuisut Taksøes suleqatigiissitaanut peqataasimammata naatsorsuutigaarpullu Nunanut Allanut Pisortaqarfik aqqutigalugu Naalakkersuisut misissuisumut apuukkusutatik apuussimassagaat.

Suliamut nammineq siuttunngorta

Taksøep nalunaarusiami Inuit Ataqatigiit sivisuumik iliuuseqarfigineqarnissaannik ujartuiffigisimasavut iliuuseqarfigeqqullugit tikkuarpai. Issittumut tunngasunik sammisaqarnerunissamut tikkuussivoq, innuttaasut toqqaannarnerusumik Nunatta illersornissaanut suliassanut peqataalernissaannik tikkuussivoq, Nunatta Issittullu qaammataasatigut nakkutigineqarnerunissaa attaveqarnerunissaalu tikkuarpaa Issittumilu sillimaniarnermut politikkikkut sammisaqarnerunissaq tikkuarpaa.

Soqutiginartipparput Arctic Five Ilulissanit Nalunaarutip ukiut qulinngortorsiortorlu 2018-mi naapeqqinnissaannik siunnersuuteqarmat. Aamma neriuppugut Nunarput ilisimatusarnikkut qitiusoqarfittut inissisimanissaanut suliniuteqarnissamik siunnersuutaa Nunatsinni ilisimatusarfinnit tigulluarneqarumaartoq, naqissusissavarpulli suliat taakkua piviusunngortinneqassappata Nunatta siuttuuffigisaanik suliarineqassasut piumasarigatsigu.

Nunarsuaq tassaannaanngilaq Nunarput Danmarkilu

Isumaqarpugut Naalakkersuisut, Siumut Demokraatillu Nunatta nalunaarusiami taaneqanngippallaarnera pillugu ajorinninnerat oqippallaartoq. Nunanut allanut, illersornissamut sillimaniarnermullu politikki Nunatsinnit Issittumiillu siammasinneruvoq. Taamaammat uagut piumasarput tassaavoq Nunarput suliassaqarfinni taakkunani nammineq politikkissatsinnik sanarfinissamut pikkorinnerulissasoq.

Inuit Ataqatigiit ujartortarsimaqaarput nunanut allanut sillimaniarnermullu politikki pillugu suliaqarnerulernissaq. Aamma ujartortaqaarput Inatsisartuni Nunanut Allanut Sillimaniarnermullu Ataatsimiititaliaq suliaqarnerulissasoq. Nunarsuarmi allanngoriartortoq pisoqarfioqisorlu isiginngitsuusaarlugu issiaannarsinnaanngilagut.

Nunarput Issittoq pillugu nammineq periusissiussaaq

Assersuutigalugu Nunarput nammineq Issittumut periusissiortariaqarpugut. Inuit Ataqatigiit siorna Naalakkersuisut nunanut allanut politikkikkut nassuiaataat oqallisigineqarmat tamanna siunnersuutigaarput. Nunatta nammineq Issittoq pillugu periusissiornermini qanoq Issittumi suleqatigiinnermut anguniagaqarnerluta oqaasertalissavarput, suleqatigiinnermullu tamatumunnga qanoq naatsorsuuteqarnerluta oqaasertalissallutigu.

Inuit Ataqatigiit isumaqarpugut Naalagaaffeqatigiinneq uniffiginanu avammut alakkaamanerunissaq Nunatta pikkorinneruffigissagaa. Nunanut allanut attaveqarnitsinni sorusuppugut? Nunarsuaq tassaannaanngilaq Kalaallit Nunaat Danmarkilu, Nunarput nunarsuarmut tamassuminnga annerusumut aamma ilaavoq.

Qanoq inissisimaniarnerluta oqaasertalertigu

Nunatta nunarsuarmioqatigiit akornanni qanoq inissisimanera pillugu upernaami Inatsisartuni ataatsimiinnermi Inuit Ataqatigiit oqallisissiamik saqqummiussaqarpugut. Nunat tamalaat akornanni qimaasut pillugit peruluttoqarnerani qanoq iliuuseqassaagut? Nunat qanigisatta sorsuttunut peqataanissamut isummeraangatta qanoq pisassaagut? Nunatta avammut erseqqissumik naleqartitatsinnullu tunngaveqartumik nipeqarnissaa qanoq qulakkiissavarput?

Tamakkua tassaapput Inuit Ataqatigiit isummatsinnik Nunatta isummerfigisinnaasariaqagai.

Taksøep nalunaarutaa ajoriinnassallugu oqippallaarpoq. Ajorinniinnarata nammineq politikkissatsinnik suliaqarta, ataatsimoorlutalu Nunatta Issittoq pillugu periusissiassaanik sanasa nunarsuarmioqataanitsinnullu isummerta.

Naammagittaalliuinnarnata nammineq alloriaqqitta.

 

Sara Olsvig

Siulittaasoq, Inuit Ataqatigiit

Nunanut allanut sillimaniarnermullu ataatsimiititaliami Siulittaasup tullia