Naalakkersuisoqatigiilerniarlutik isumaqatigiissumminni Siumut, Atassut aamma Partii Inuit allapput inuiaqatigiit atugarisaat oqilisisaaffigineqassasut. Allassimanngilarli qanoq iliornikkut tamanna anguniarneqarnersoq. ”Tassanilu iliuuserineqarsinnaasut pillugit sukumiisumik nalilersuineq ingerlanneqassasoq”, taamaallaat allassimavoq. Taamaattumik akileraarutinut tunngasunik Inatsisartuni marlunngormat oqallinnermi Inuit Ataqatigiinniit piffissaq atorniarsimavarput, Naalakkersuisut siullermeerlutik Inatsisartunut saqqummiussaqaqqaarnerat iluatsillugu atugarissaarneq akileraartarnerlu pillugit Naalakkersuisut politikkiat annertunerusumik paasisaqarfigerusullugu. Ajoraluartumilli Naalakkersuisut partiilluunniit suleqatigiit pingasuusut arlaannaataluunniit aqqut suna atorneriarnerlugu akissutissaqarfigisimanngilaat.

Naalakkersuisoqatigiit sapaatip akunnera ataasiinnaq atuuffimmini politikkikkut takor-luukkatik qanoq aningaasalersorneqassanersut suli iluamik inissivissimanngikkaat paasinarsinnaagaluarpoq. Kisianni oqallinnerup ajoraluartumik takutippaa, takorluuk-kaatik suunersulluunniit ilisimanngikkaat, nalugaat. Siumup, Atassutip Partii Inuillu oqaa-seqartartuisa arlaannaataluunniit oqaatigisinnaanngilaat atugarissaarnikkut pitsanngorsaavissat sorliit tulleriiaarinerminni immikkut pingaarnerutissanerlugit. Partii Inuit oqaaseqartuat Randi Broberg uumitsappasivilluni akivoq, partiimit nutaamit erseqqissumik akissuteqarsinnaaneq naatsorsuutigineqarsinnaanngitsoq! Aningaasaqarnermut Naalakkersuisunngorlaaq akissutissamik aamma piareersimasuuteqanngilaq. Naggataa-tigut Naalakkersuisut siulittaasortaavata oqariartuutigivaa, isummiussanik saqqum-miussinissaq piffissanngorumaartoq neriorsuutigisinnaallugu. Siulittaasorli taamaalilluni aamma ersarinnerusunik oqaaseqanngilaq. Naalakkersuisoqatigiit isumaqatigiillutik oqa-riartuutituaat tassatuaannavoq, Naalakkersuisuusimasut sulianik aallartissimasaannit allaanerusunik suliaqalerumaarlutik.

Naalakkersuisoqatigiit isumaqatigiissutaat atuaraanni, akileraartarnermut tunngasuni tassatuaannaavoq ingerlatseqatigiiffinnut akileraarutip appartinneqarnissaa. Qanorli ilillu-ni inuiaqatigiit inuuniarnerisa pitsanngortinneqarnissaat tassuunakkut anguneqassaner-soq takorlooruminaatsupilussuuvoq.

Inuiaqatigiit inuuniarnermikkut atugarisaasa pitsaanerulernissaannut Inuit Ataqatigiit suleqataarusuppugut. Ilaana suleqataarusoqaagut. Uagutsinnut ajornartorsiutaanngilaq ingerlaviit siunnerfiillu allat, qinigaaffiup kingulliup ingerlanerani ingerlatsinitsinnit allaanerusut atussagutsigit, – pingaarnerpaaginnarpoq sunniutai taakkuussammata, taasalu atugarisat pitsaanerusut. Tupigivarpulli suut suliniutigineqassanersut ilisimaneqanngimmat. Tupigivarput naalakkersuisoqatigiit isumaqatigiissusiornerminni partiimik isumassa-qanngitsumik takorluuisinnaanngitsumillu isumaqatigiissusiorsimammata, qanorlu takorluugaqarnerminnik politikkeqarnerminnullu aperineqaramik narrassuteqaannarsinnaasumik.

Naalakkersuisoqatigiilersut nutaat isumassarsiarisimasaannik pingaarnersiuillutillu tullerii-aariniarnerannut tunngasunik akissutisinissarput suli utaqqivarput. Suleqatigiissaguttami pisariaqarpoq ilisimassallugu suna suleqatigiissutigissanerlugu. Ukiamullu aatsaat Naalakkersuisoqatigiilersut suniarnertik paasissagaluarpassuk piffissaq utaqqivissarput sivisuallaaqaaq.