Inuit Ataqatigiit Ilaqutariinnermut Naalakkersuisoq aammaarluta apersorneqarnissaanik piumasaqaateqarpugut. Apersuutigineqassapput meeqqat inuusuttuaqqallu angerlarsimaffiup avataanut inissinneqarsimasut pillugit kommunit aki-sussaaffimminnik maannamut kivitsinnginnerat.

Maanna Naalakkersuisumit pingajussaat isumasioqatiserinnittariaqarpugut, ersarissigaluttuinnarmat politikkikkut oqarluartaarutit nalunaarutillu oqaasiinnaasut; annerusumillu iliuuseqartoqarsimanani.

Inatsisartut Ilaqutariinnermut Ataatsimiititaliaata Naalakkersuisut peqqunikuuaat qulakkeeqqullugu, meeqqat inuusuttuaqqallu angerlarsimaffiup avataanut inissinneqarsimasut tamarmik iliuusissamik pilersaarummik nutartikkamik peqassasut kingusinnerpaamik 1. september 2014. Tamannalu pisimanngilaq. Imaappoq ullumikkut meeqqat 240 tikillugit inatsit malillugit pisinnaatitaaffimminnik peqanngillat.

“Piumasaqaatigaarput inatsisit avaqqullugit meeqqanut sullissineq unitsinneqas-sasoq. Meeqqat inuttut immikkut pilersaarusiunneqartussaapput, tamanna pisinnaatitaaffigivaat. Ilumoorsinnaanngilaq meeqqat angerlarsimaffiup avataanut inissinneqarsimasut 40 %-ii tikillugit pilersaarusiuunneqarsimanngitsut, tamanna aaqqiivigineqarniarli. Ilaqutariittut inuunermut meeqqanullu pineqartunut pingaaruteqarpoq.

Isumaliutigisariaqarparput akisussaaffik pineqartoq qitiusumit isumagineqalissanersoq, iliuusissatut pilersaarutit kiisalu meeqqat ilaquttaminnut attaveqarnerat eqqarsaatigalugu. Ilaatigut ombudsmandip nalunaarusiai atuarlugit qiimmaallannanngilaq; meeqqat ilaquttaminnut ilaatigut attaveqanngivissortut kiisalu iliuusissamik pilersaarusiuunneqarsimanngitsut.

Sammisaq ilungersunarpoq, taamaammat kommunini tamani isumaginninnermut ataatsimiititaliat ataatsimeeqatiseriniarpavut, tamattami oqaloqatigiinnitsigut atasinnaasumik pitsaasumillu aaqqiisariaqarpugut.  Ilisimavarput kommunini inunnik sullissisut siunnersuisartullu, atugaat imaannaanngitsuusut. Malinnaaniarpiloorput, ilaatigullumi allaat sullissisup ataatsip sullissassat 100 sinnillit tigummisarpai, tamannalu attanneqarsinnaanngilaq suliamullu pingaarutilimmut tulluanngilaq; sullissamut sulisumullu naleqassutsimik annaasaqarfiuvoq.” Juliane Henningsen erseqqissaavoq.

Attavissaq: Juliane Henningsen, Ilaqutariinnermut Ataatsimiititaliami ilaasortaq, mobil 48 81 48