Sooq taava Demokraatit Naalakkersuisooqataanissaq naaggaarpaat?

Nutaarsiassaajunnaarpoq Naalakkersuisut inatsisissatut siunnersuusiaat pillugit Demokraatit sakkortuumik naammagittaalliuteqartarnerat. Tusagassiorfitsigut nalunaartarput Naalakkersuisut inatsisissaq allanngortinngippassuk suleqatigiinneq atorunnaarsissallugu siorasaaralutik. Sooq taava Demokraatit Naalakkersuisoqarfinnik akisussaaffimmik tigusillutik suleqataasimanngillat?

Ingiinnarluni inuit Naalakkersuinikkut sulisut suliaannik isornartorsiuiinnarluni partiitut atuuffeqarneq suleqataanermik akisussaaffimmillu tigusisinnaanermik taarserneqarniarli. Demokraatimmi periarfissaqarsimapput Naalakkersuisoqarfinnik tigusillutik sulianik ilusilersueqataanissaminnut. Akisussaaffik annertooq qunugisutut illugu patsisilersuutigaat Siumup ilumini ilungersunartorsiornera pissutigalugu Naalakkersuisooqataarusunnatik.

Nunatsinni inuiaqatigiittut arlagut unamminartumi inissisimappata akisussaaffimmik tamatta tigusisariaqarpugut pingaartumik nunatta aqunneqarnera pineqartillugu. Aamma tamanna Demokraatinut isornartorsiuiinnartunut atuuttariaqarpoq pisussaaffittut isigineqartariaqarpoq. Ajornartorsiortoqarsorigaanni qimarratiginniinnarneq nukittoqqutissarinngilarput. 

Inatsisissat aalajangiiffigisassallu tamaasa ilusilersorneqarneranni suleqatigiit periarfissaqareeraluarput inatsisissatut siunnersuutit qanoq ilusilerneqarnissaat pillugit suleqatigiinnissaminnik. Suleqatigiinneq pitsaanngimmat aatsaat tusagassiorfitsigut-aasiit kikkut tamarmik malinnaatillugit Demokraatit piumasaminnik nittarsaaassiniartartuunertik takutippaat. Suleqatigiinneq pitsaanerusoq ataatsimoornermik tunngaviliiniartoq ujartorpara. Isumaqarama Demokraatit ingerlatseriaasiat oqinnersiuiinnarluni naalakkersuinikkut sunniuteqarniarnertut taasariaqartoq.

Naalakkersuisunut ikinnerussuteqartunut Demokraatit tunuliaqutaanertik torrallassimanngikkunikku Naalakkersuisoqarfinnut suleqataajartorniarlik. Akisussaaffimmik tigusiniarlik. Tupinnaqaaq. Parti Siumut naalakkersuinikkut misilittagartuutut taasinnaasarput siuttuusorlu Demokraatinulluunniit uparuaasinnaajunnaavilluni inissisimalermat. Naalakkersuinikkut nukik pilersinneqassappat massakkut ingerlatseriaaseq allanngortariaqarpoq. Inuit Ataqatigiit sinnerlugit kaammattuutigerusuppara suleqatigiinneq pilersinneqartoq tanngassimaarutigisutut nilliaatigiinnarnagu suliassaqarfinnik akisussaaffinnik tigusisinnaassuseqarnissaq pingaarnerpaajusoq.

Demokraatit Naalakkersuisoqarfinnik tigusiumanngillat Siumumi pissutsit ilungersunarnerat patsisiliullugu. Demokraatit Naalakkersuisut suliat tusarniutigisaat pillugit naammagittaalliuinnartarlutik pinatik Naalakkersuisuutitaqarsimasinnaagaluarput. Tassa qinikkat akisussaaffimmik tigusisinnaasut sulisullu peqataaffiginagit avataaniit piumasaqaqattaaginnartut aamma Siumup nipaarulluni pissaaneerussimasutut Demokraatinut naalattussiaannartut akisinnaajunnaarsimanera pissaaneqarusuttut suna tamaat tikillugu ataniarnerannut ersiutaasoq isumaqarpunga.

Nunarput inuiaqatigiillu nunatsinniittut ingerlalluaqqullugit suleqatigiissinnaasunik siulersorneqarnissaat tassa pisariaqalerpoq. Naalagaanniunneq partiillu ataasiakkaat piumasaminnik pinngikkunik suleqatigiinneq isassasoq siulittuutigisaqattaarlugu aqutseriaaseqartut eqqarsaqqinniarlik nunarput qanoq siuttuuffiginiarnerlugu. Akisussaaffik angeqaaq torersumik aamma suliarineqarsinnaavoq. Naalagaanniallaqqinneqqusaanneq suleqateqallaqqinneqqusaaannermik taarsersiuk. Suleqatigiinneq tamatsinni nukittunerulersitsigu. Akisussaaffiit tigusarlugit suliassaqarfiit ornillugit sunniuteqarfigalugillu sulisariaqarpugut. 

Inuit Ataqatigiit

Siulittaasuata tullia

Aqqaluaq B. Egede