Sinerissap qanittuani nipisanniarneq pillugu aqutsinissamut pilersaarummi, MSC-imik nalunaaqutserneqarnissamut ilaalluinnartumut, oqaatsimik ataatsimilluunniit oqaatigineqanngilaq ukiumut pisassat sinneqarsimappata taakku ukiup tullianut nuunneqarsinnaasut.

Taamaattumik Inuit Ataqatigiit Inatsisartuni paaserusupparput nipisaat 2019-imi aalisarneqanngitsoortut 204 tonsit 2020-imut nuunneqarnissaannik Naalakkersuisut 12. Maj 2020 aalajangiinerat inatsisitigut sumik tunngaveqarnersoq.

MSC-imik nalunaaqutserneqarsimaneq akigissaartitsivoq. Akit pitsaasut aalisartunut amerlasuunut, pingaartumik mikisunik angallatilinnut, ilaqutaapput. Taamaattumik paasilluarsinnaakutsoorparput Qeqertarsuup Tunuani aalisartut ataatsimoorlutik nalunaaruteqarnerminni ernumassutigisaasa ilagimmassuk pisasseeqqinnerup akinut aammalu MSC-imik nalunaaqutsiisimanermut pitsaanngitsumik sunniuteqarnissaa. Nipisaat aalisarneqarsinnaasut qaffannerisigut akit apparnissaat Naalakkersuisut aqqutissiuuppaat, taamalu aalisartut siunissami isertitassaat eqqorneqanngitsoornaviaratik. Pisassanik qaffaanermikkut MSC-mik nalunaaqutsiisimaneq Naalakkersuisut ernumanartumut inissippaat.

Taamaattumik Inuit Ataqatigiit Inatsisartuni naatsorsuutigilluinnarparput Aalisarnermut, Piniarnermut Nunalerinermullu Naalakkersuissup innuttaasut oqaluttuutissagai suna tunngavigalugu Naalakkersuisut aalajangersimanersut aalisartut isertitaqarsinnaanerannut taama annertutigisumik nalornilersitsinermik pilersitsisumik. Aamma paaserusupparput Naalakkersuisut 100 procentimik qulakkeersinnaanerat 204 tonsinik nuussineq MSC-mik nalunaaqutsersuinermut kinguneqarlussanngitsoq.

Inuit Ataqatigiit, Inatsisartuni

Share and Enjoy !

0Shares
0 0 0