Qeqertarsuup Tunuani angallanneq ineriartuutaasussamut saatsinneqarli

Qinikkatut Qeqertarsuup Tunuani angallannikkut pissutsit taamaatsillugit ataqatigiinnginnerat kipiluttunarnerilu naammagiinnarneqarsinnaanngitsutut oqaatigisariaqarpoq.

Qeqertarsuup Tunuani angallannikkut pissutsit ataqatigiinnginnerat kipiluttunarnerilu Naalakkersuisut paasisinnaanerpaat?

Sooruna Qeqertarsuup Tunuani angallannikkut pissutsit pitsanngorsaavigissallugit Naalakkersuisut timitaleerusuffiginngikkaat?

Ullumikkut Qeqertarsuup Tunuani inunnik angallassinerup inissisimanera ataqatigiinngilluinnarpoq, naalakkersuinikkullu piaartumik iliuuseqarfigineqartariaqalerluni.

Qeqertarsuup Tunuani angallassineq eqqarsaatigissagaanni maajimiit silaannakkut angallanneq unitsinneqartarpoq, kiisalu sinersortaat Sarfaq Ittuk Kangaatsiamut Qasigiannguanullu tikisinneqartarunnaavinnikuulluni. Qeqertarsuaq ukiakkut taamaallaat tikinneqartalerpoq. Ukiut 20-it siuliinut sanilliutissagaanni ullumikkut Qeqertarsuup Tunuani angallannikkut pissutsit pitsaanngoriartorsimanngillat, maannakkullu ineriartuutaasussamut alloriaqqittoqartariaqalerluni.

Aasakkut silaannakkut angallannerup atorunnaarsinneqarnikuunerata kingunerisaanik ungasinnerusumut, soorlu Ilulissaniit avannamut kiisalu Aasianniit kujammut angallannerup ataqatigiinnerusumik aaqqissuunneqarnissaa pisariaqarluinnarpoq. Qeqertarsuup Tunuani angallannikkut ataqatigiissaarinerup pitsaannginnera pissutigalugu amerlasuutigut unnueqqaartariaqarneq pisariaqartarpoq,  tamannalu angalasunut ataasiakkaanut annertuumik aningaasartuuteqarujussuarnermik kinguneqartarluni. Nalinginnaasumik unnuineq 1.000 kr. sinnerlugit akeqakkajuttarpoq, inummut ataatsimut unnuineq ataaseq eqqasaatigalugu. Angalanermut billetsit akii qaffasereeqisut saniatigut unnuinermut nerisaqarnermullu aningaasartuutinut inuit ataasiakkaat akileerujussuaqqaarlutik artukkerneqartarnerat killeqartariaqalerpoq. Innuttaasut ajornaannerusumik angalalertorsinnaanissamut pisinnaatitaaffeqartariaqarput.

Ullumikkut inuppassuit Disko Linep angallatai mikisut ullutsinnut aammalu avatangiisimut silamullu imaannaanngissinnaasunut naleqqutinngitsut atorlugit silaannakkut immakkullu angalasariaqartarput. Angallanneq pitsanngorsarneqassappat timmisartut umiarsuillu avatangiisimut pinngortitamullu imaannaanngissinnaasumut naleqqunnerusut atorneqalernissaannut Naalakkersuisut pilersaarusiortariaqarput aningaasaliillutillu.

Disko Linep maannakkutut isikkoqartillugu Qeqertarsuup Tunuani angallanneq kivissinnaanngikkaa uppernarsereerparput. Angallannikkut kiffartuussinissamik isumaqatigiissutit ukiup tulliata naanerani atorunnaartussaassapput, 2021-miillu atuuttussat nutarterneqartussanngorlutik. Angallannikkut pitsaanerusumik ataqatigiinnerusumillu aaqqissuussisoqarnissaa piffissanngorpoq. Disko Linep suliaq tamakkiisumik kivissinnaanngippagu, innuttaasullu toqqissisimasumik angalasinnaanissaat qulakkeersinnaanngippagu Disko Line atorunnaarlugu allatut aaqqiisoqarsinnaanera tunuarsimaarfigineqartariaqanngilaq.

Aamma innuttaasut angallannikkut atugarisaat pitsanngorsaaqataaffigeruppagut. Angallannikkut pissutsit taamaatsillugit aaqqiviginissaat suleqatigiilluta akisussaaffigissavarput.

Angallannikkut pissutsit pitsaasuunnginnerat inuiaqatigiinni annaasaqaataareersoq tassunga killittariaqarneranik innuttaasut oqariartuuteqarput.

Maanna mittarfissuit sanaartorneqarnissaat piviusunngortinneqartussanngorpoq. Nunatta sineriaata sinnerani angallannerup ataqatigiinnerusumik aaqqissuunneqarnissaanut pilersaarutinik erseqqinnerusunik Naalakkersuisut innuttaasunut saqqummiussisariaqalerput.

Naggataatigut Qeqertarsuup Tunuani innuttaasut toqqissisimallutik angalasinnaalernissaat qulakkeerniarlugu, Sarfaq Ittuk Qeqertarsuup Tunuani illoqarfinnut tamanut tikittaleqqissinnaanera innuttaasut oqariartuutaat Naalakkersuisut tusaatissatut tiguinnarnagu iliuuseqarfigisariaqarpaat. Taamaaliornikkut takornariat kisimik pitsanngorsaavigineqaratik, pingaarnertulli innuttaasut nunaqavissut qitiutillugit pitsanngorsaavigineqassapput.

Aqqa Samuelsen, mobil 52 37 03

Inuit Ataqatigiit.

Inatsisartunut ilaasortaq