Allattoq: Aqqa Samuelsen, Inuit Ataqatigiit sinnerlugit Inatsisartuni ilaasortaq

Qasigiannguit Aasiaallu akornanni erngup nukissiorfiliassaq pilertortumik sanaartorneqarnissaa kissaatigaarput

Qasigiannguit Aasiaallu akornanni erngup nukissiorfiliassaq, kiisalu Nuummi erngup nukissiorfiup pilersuisinnaanerata annertusarneqarnissaa ataatsikkut sananeqarnissaat Inuit Ataqatigiit kinguarsarneqarani pilertortumik aallartinneqarnissaat sakkortuumik kissaatigaarput.

Siullermik Inatsisartut upernaakkut 2019-imi ataatsimiinnerani aaliangiiffigisassatut siunnersuutigisatta Qasigiannguit Aasiaallu akornanni erngup nukissiorfiliassap sanaartorneqarnissaanut Naalakkersuisut piviusorsiortumik pilersaarusiorlugu aallartimmassuk nuannaarutigaarput.

Qasigiannguit Aasiaallu akornanni erngup nukissiorfiliassaq nukissiuutinik ataavartumik pinngortitamullu mingutsitsinngitsunik ineriartortitsinissamut pinngitsoorneqarsinnaanngilaq.

Nuummi aamma Qasigiannguit Aasiaallu akornanni erngup nukissiorfiliornissamut Naalakkersuisut ukiaq manna siunnersuutaannut ersarissumik oqaatigaarput suliaq kinguarsarneqarani pilertortumillu sanaartorneqarluni aallartinneqassasoq. Imaassanngimmammi aatsaat Nuummi erngup nukissiorfiorfiata annertusineqarnerata kingorna aningaasartuutit imminut akilereernerpata iluanaarutinik pissarsianik, tassa ukiut 22-it qaangiuppata aatsaat erngup nukissiorfiliassaq sananiarneqalissasoq.

Oqaatigerusupparputtaaq; Naalakkersuisut 2020-mi ukiakkut Inatsisartut ataatsimiinneranni ernugup nukissiuteqarneq Nuummi Qasigiannguit Aasiaallu akornanni suliarineqarnissaat aammalu qanoq aningaasalersorneqarnissaat pillugu siunnersuuteqarniarnerannut qilanaaratta tassungalu utaqqiinnarata suleqataanissatsinnut piareersimavugut.

Ataaserli maannangaaq aningaasalersueriaatsimut piginnittoqarnermullu apeqqummut tunngasumut ersarissumik oqaatigiumasarput tassaavoq; kissaatiginngilarput Nukissiorfiit A/S-itut ingerlanneqalernissaat. Taamaaliornermi nammaqatigiinnermit tunngaveqarluni ingerlatsinermit illikartitsinerussammat inuillu nalingiinnginnerusimik atugaqarnissaannut aqqutissiuussisuussalluni.