Qasigiannguit Aasiaallu akornanni erngup nukinganik nukissiorfiliassaq akuersissutigineqarpoq

Qasigiannguit Aasiaallu akornanni erngup nukinganik nukissiorfiliornissamut siunnersuut Inatsisartuni amerlanerussuteqarluartumik ulloq 27. maj 2019 akuersissutigineqarpoq.

Siunnersuutip akuersissutigineqarnera siunnersuuteqartut nuannaarutigeqaara, Qasigiannguit Aasiaallu akornanni erngup nukinganik nukissiorfiliassaq ukiorpaalunngortuni oqallisaajuarsimavoq. Oqallisaaginnarani maannakkut piviusorsiortumik timitalerneqarnissaanut suliniutit aallartisarneqarlutik toqqammavissinneqassapput.

Qasigiannguit Aasiaallu akornanni nukissiorfiliassaq piviusunngortinneqarpat tamanna Naalakkersuisut nukissiutinik atuinermi 2030 piujuaannartitsinermik Nunatta sinneranut, minnerunngitsumillu najukkami inuussutissarsiornermik ingerlataqartunut, kommunimut innuttaasunullu pitsaasumik sunniuteqartussaassasoq qularutissaanngilaq.

2030-mi nukimmik pilersuineq Nunatsinni sapinngisamik nukimmik ataavartumik tunngaveqassasoq nukimmik imermillu pilersuineq pillugu pilersaarummi saqqummiunneqarpoq. Anguniagassaq pitsaalluinnartoq timitalersorneqarluni sanaartortoqarnissaanut tunngasut peqqissaartumik pimoorullugillu pilersaarusiorneqartariaqarput.

Qasigiannguit Aasiaallu akornanni erngup nukinganik nukissiorfiliornissamut tunngavissaliornermi ilanngullugu erngup nukiganik nukissiorfiliassap qanittuaniittut illoqarfiit nunaqarfiillu sorliit ilanngunneqarsinnaanissaat naliliiffigineqarsimassaaq taavalu nukissiutinut ataavartunut assigiinngitsunut Igalikomi misilittaanermi paasisat atorneqarsinnaanersut ilanngullugit nassiuaasiuunneqassallutik.

Alloriarneq annertooq, qularnanngilluinnartumik Nunatsinnut tamarmut, inuussutissarsiutinik ingerlataqartunut, innuttaasunut, minnerunngitsumillu nukimmik piujuaannartumik atuinerulernitsinni pinngortitap mingutsinneqannginnissaanut paarilluarneqarnissaanullu iluaqutaalerumaartoq qularutissaanngilaq.

Qasigiannguit Aasiaallu akornanni erngup nukissiorfiliornissamut tunngatillugu Naalakkersuisut piviusorsiortumik suliniuteqarnissaat pingaaruteqarpoq. Suliniutip piviusunngortinniarnerani Naalakkersuinikkut piffissami aggersumi qanimut suleqataaffigalugulu malinnaaffigissavarput.

Aqqa Samuelsen, Inatsisartunut ilaasortaq