Inuit Ataqatigiit Qaqortumi mittarfiliornissamut ilungersuuteqaratta killiffissiuvilluta Attaveqaateqarnermut Naalakkersuisumut § 37 atorlugu apeqquteqaateqarpugut.

Ilaatigut killiffissiuilluta, misileraalluni timmisartornerit qaqugu pissanersut, minnerunngitsumillu suliap sumut killinnera paaserusullugu naalakkersuisunut apeqquteqaateqarluta.

2017-imi novemberimi kommunalbestyrelsemi partiit tamattaalluta borgmesteri peqasiullugu suliaq qanoq ingerlanersoq apeqquteqaatigaarput, tassanilu akineqarpugut ukiup ataatsip ingerlanerani misileraanerit naammassisussatut tagginneqartut..

Maanna septemberi qiteqquppoq, paasisavullu malillugit misileraanerit suli naammassinatillu aallartissimanngitsulluunniit paasivarput.

Qaqortumi mittarfissaq pilersinneqassappat timmisartup mikkiartornerani silaanaap aalarulunneranik misissuinerit amigaataapput, taakkulu pitinnagit suliaq aallartinneqarsinnaanngilaq, mittarfissap sammivissaanut taamalu inissisimaffissaannut aalajangiisuulluinnartussaammata. Inuit Ataqatigiit tamanna innersuussutigivaat, innersuussutaasorlu siorna novemberimi Naalakkersuisut akissutaanniit allaanerungaanngimmat paasiiuminaatsipparput borgmesterip taamak sakkortutigisumik isornartorsiuinera eqqarsaatigalugu.

Kommune Kujallermi ineriartoqqinnissaq tamatta sulissutigivarput, inuussutissarsiornerlu ilorraap tungaanut ingerlaleqqissappat, pinngitsoorsinnaanngilarput illoqarfittut allatuulli suluusalinnut mittarfeqalernissarput. Minnerunngitsumik takornariaqarnikkut inerisaanissaq inuussutissarsiortut susassaqartut pisariaqartimmassuk.

Tamanna akisussaaffik Inuit Ataqatigiit ilisimalluarlugu pingaartilluinnarparput, taamaattumillu mittarfiliornissamut misissuinerit killiffii pillugit ilungersuuteqarluta. Inuit Ataqatigiit suliamut kingaatsumik ingerlatsineq akuersaanngilarput illua-tungaanili piaartumik susoqartariaqarneranik ilungersuuteqarluta.

Mannalu  iluatsillugu borgmester Kiista P. Isaksen suliap ingerlanneqarneranut parteeqatimi ukiorpassuanngortuni neriorsuutaa naammassiniaqqullugu oqariartuuteqarnissaannik kajumissaarumavara.

Mittafiliornissamut sulianik misissuinerit nunatta nammineq aningaasalersussammagit  arsaq naalakkersuisut nerrivianniippoq, iluunngarlungalu Naalakkersuisut qinnuigivakka misileraanissanut aningaasaliissuteqaqqullugit,  taamaasilluni ukiup naannginnerani pappilianngorlugit Inatsisartuni sammineqarniassammata, ilami kujataani ukiorpassuarni utaqqereerpugut.

Inatsisartuni, kommunalbestyrelsemilu ilaasortaq
Stine Egede, Inuit Ataqatigiit