Inuit Ataqatigiit politikkikkut suliassanik inuiaqatigiinnut sunniuteqarluartussanik aallutaqaqqinnissarput qilanaaraarput. Ukiami Inatsisartut ataatsimiinnissaannut siunnersuutit katillugit 32-t saqqummiuppavut. Angusaqarfiulluartumik politikkikkut sulinissaq maanna sammineqarlunilu aallarteqqittariaqarpoq. Qilanaaraarput partiit tamaasa Inatsisartuni paaseqatigiilluarnikkut suleqatigiinnikkullu Nunarput inuttaasullu sullillugit peqatigissallutigit.

Siunnersuutitsinni qulequttat pingaarnerit tassaapput:

  • Isumaginninneq meeqqallu atugaat
  • Inuussutissarsiorneq, suliffeqarneq aqutsinerlu
  • Eqqumiitsuliornikkut siuarsaaneq

Isumaginninneq meeqqallu atugaat sukumiisumik aallutissavagut

Nunatsinni isumaginninnikkut suliat katatavut amerlaqaat. Inoqativut ikiorneqarnissaminnut pisariaqartitsisut tusaanngitsuusaaginnarsinnaanngilagut. Inoqatigut pisariaqavissumik inuunerminni artorsaateqarnermikkut ingerlariaqqinneq ajulertut isumaginninnikkut sullissinnaanissaannut pisortaqarfinni inuiaqatigiittullu nukissaqarfigilertariaqarpavut. Pikkorinnerulertariaqarpugut sunniuteqartumik ikorfartuinissatsinnut. Inuit Ataqatigiit pingaarnertut suliaq taanna kivitseqataaffigerusupparput. Inatsisartuni siunnersuutitsini qitiulluinnartumik isumaginninnikkut aaqqitassagut salliutillugit sukataarniarluta siunniupparput.

Inuiaqatigiinnimi aningaasaqarnikkut siuarsaanitsinni, aalisarnikkut, takornariaqarnikkut aatsitassarsiornikkut, inuussutissalerinikkut allatigullu, nukik pingaarnerpaaq tassaavoq inuk peqqissoq, toqqissisimasoq inuiaqatigiinnilu suliffimmini peqataalluarluni kivitseqataasoq. Inuiaqatigiit nukittuut tassaapput inoqatiminnik pitsaasumik isumaginnittut kinaagaluarunilluunniillu inissaqartitsisut

 

Isumaginninnikkut siunnersuutit ukuupput:

  • Ulluunerani paaqqinnittarfinni perorsaasut atugaannut periusissiaq.
  • Isumaginninnikkut sulisunut pitsanngorsaanissaq pillugu periusissiaq.
  • Ilaqutariinnut angalanissamut aningaasaateqarfik
  • Ussersorlutik atuisut peqqinnissaqarfinni sullinneqarnerat.
  • Angerlarsimaffeqanngitsunut illunik sanaartorneq.
  • Utoqqarnut tulluarsakkanik inissialiorneq.

Inuussutissarsiorneq, ilinniartitaaneq, aqutsineq sulisoqarnerlu ingerlaqatigiissapput

Inuit Ataqatigiit pingaartipparput inuussutissarsiornikkut suliffeqarfinnilu sulisartunut sinaakkutit pitsaanerpaat qulakkiissallugit. Nutaaliorneq pinngorartitsinerlu inissaqartittariaqarpavut siuarsarlugillu. Inuiaqatiginni innuttaasut ikiliartuinnarpugut, sulisartoqarnikkut ilaqutariissutsimut aamma inissaqartitsissaagut. Anaana ataatalu suliffeqaraluarlutik meeqqaminnut piffissaqarluarnissaminnut periarfissaqassapput. Tamanna anguniassavarput.

Inuiaqatigiinni nukissallit amerlaqaat suliffeqarfinnilu nunatsinneersunik atorfinitsitsinerunissaq ilinniartitseqqinnerunissarlu pisariaqarpoq. Taamaammat Inuit Ataqatigiit assersuutigalugu piginnaasat inuttut pigilersimasavut suliffeqarfinni aamma atorluarnerunissaat siunnersuutigaarput.

Inuussutissarsiornermut siunnersuutit sunniuteqartussat ukuupput:

  • Pisortani allaffissornikkut aaqqissugaanerata nalilersornissaanut ataatsimiititaliarsuarmik pilersitsinissaq
  • Aallarnisaasunut attartortitsisarneq
  • Sulisut amerlanerpaat nunatsinneersuunissaat pillugu periusissiaq.
  • Inuusuttut akornanni suliffissaaleqineq akiorniarlugu periusissiaq.
  • Ilaqutariit meerartalinnut sulisoqarnermut politikki pillugu periusissiornissaq.
  • Piginnaasaqarfigilersimasat naapertorlugit atorluaanerulernissaq aamma atorfinitsitsisarneq.
  • Suliffeerunnermi ikiorsiissutinut tunngatillugu inatsisip allanngortinnissaa
  • Pisortanik atorfinitsitsisarnermi periusissaq.
  • Piniakkat killilersukkat piniartortavut takornarissallu.
  • Raajat qalipaanik atorluaanissaq.
  • Inuussutissanik nioqqutissiornermi ilinniartitaanermi neqeroorutit.
  • Savaatillit nutaat akiitsunik kingornussinnginnissaat.
  • Nunatsinni inuit ikiliartuinnarnerat mumisinniarlugu iliuuseqarnissaq
  • Imarsiornermi inuussutissarsiutillit atorfinitsitaasarneri.

 

Eqqumiitsuliorneq sapiissuseqarfigissavarput

Ukiaq manna eqqumiitsuliorneq immikkut inuiaqatigiinnut pingaartutut eqqaarusupparput. Eqqumiitsuliorneq anersaakkut kinaassutimullu tunngasuuvoq inuiaqatigiinnullu inunnullu ataasiakkaanut anersaakkut nukittorsaataalluni.

Eqqumiitsuliornikkut sulialinnut atukkat pitsanngorsassavagut. Sunngiffimmi sukisaarsaataaginnarani inuiaqatigiinni inuussutissarsiutitut immikkut akuerisaassaq. Inuit Ataqatigiit isumaqarpugut eqqumiitsuliornikkut nunatta aningaasaqarnera siuarsarneqarsinnaasoq, avammut nunatsinnut nittarsaassisuummat, allatulli tunisassianngorsinnaalluni, takornariaqarnikkullu siuarsaataalluarsinnaalluni. Eqqumiitsuliorneq pillugu uku siunnersuutit saqqummiuppagut:

  • Eqqumiitsuliornermut aningaasaateqarfimmik pilersitsinissamut misissuinissaq.
  • Eqqumiitsulianik katersugaasiviup pilersinneqarnissaa.

Inatsisartuni oqallinnissaq qilanaaraarput, qularinngilarpullu angusaqarfiulluarumaartoq.

 

Sara Olsvig

Siulittaasoq
Inuit Ataqatigiit