Pissaaneqarusussutsip Kangerlussuaq nalorninartorsiortippaa

Ulloq 1.nov.2018 Qeqqata Inuit Ataqatigiivinut alianartuuvoq. Inatsisartut amerlanerussuteqartut aalajangiimmata Kangerlussuup Mittarfissuartut atorunnaarnissa, ilami atorunnaarsingaaramikku aperineqarunik Kangerlussuup mittarfia 1500 meteriussanersut imaluuniit heliportinngussanersut akisinnaanngilaat.

Sisimiuni Inuit Ataqatigiit Kangerlussuup mittarfissuartut atuinnarnissaanut ilungersoqataavugut. Taamaaliorpugut nalunnginnatsigu Kangerlussuaq siunissami inuussutissarsiornikkut ineriartorfissanik ulikkaartoq.
Kangerlussup mittarfiata 2810 meteriunerata peqqutigisaanik timmisartorsuit aningisuut takornarianik nunanik tamalaaniit ulikkaarlutik mittarput. Qimusseriat,qimussumik umimmanniat, qimussimik tuttunniat, eqalunniat, sermersuarmut tummariat, umiarsuarsuarnut ilaallutik sinersoriat, Sisimiunut pisukkiat il.il. Nalunnginneqarnerpa Kangerlussuarmi sermersuup tungaanut aqqutaani taseqarmat qaqutigoortunik umassuseqarfiusumik ? Nunarsuarmi allamik taamaattunik takusassaqanngilaq.

Kangerlussuaq nunarsuarmi miffigiuminarnissaat tullerigaat ilisimavisiuk?

Inatsiartut aaliangernerisa kinguneriumaarpaa qulaani taakkartukkat nungukkiartornerat. Takornarissat Nuummut toqqaannartalissapput aammalu Ilulissanut qaammatit pingasuni toqqaannartoqartassalluni, taamaattumillu toqqaannaq Kangerlussualiassaartoqassooq, immaqalu helikopterimik takornarissat kangerlussuarmut ingerlanialoortalissallutik.

Kingunissat suuppat?

Kangerlussuup annikillisarneratigut suliffiit qassit matussappat? Tamakku akineqarsinnaanngillat, kisianni qularutissanngilaq suliarpassuit peerutissapput, inuit ikilissapput ,meeqqat ikilissapput, atuarfiat ingerlaannassava ? Peqqissaasutut atorfik ataannassava ? imaluuniit nunaqarfittut 50-100 inulittut akut taskeqartumik taarsissava ? tassa peqqissaasutut atorfik peerneqassava ? Nukissiorfik qanoq annertutigisumik ingerlatinneqassava ? Hoteli ammaannarsinnaava? neriniartarfiit matussappat ? Inukillisaammammi kikkut neriartortassagamik ?

Nalunanngilluinnarpoq Qeqqata kommunea aningaasatigut annertuunik annaasaqassaaq. Siunissarlu ima isikkoqalissaaq; Nuuk Ilulissallu kisimik nutserfigineqalissapput, sinerissap sinnera inuerukkiartortoq.

Pilluaritsi Siumut, Demokraatit, Nunatta Qitornai, Qeqqata kommuneata kinguariarnissaa akueraarsi!

Saammarsaatigaarsi Sisimiuniit Kangerlussuarmut aqqusinissaq misissuifiginiagarsi. Aqqusineq iluaqutaasaaq aatsaat Kangerlussuaq mittarfissuartut ataannarpat, suummi aalisakkat aqqusinikkut Kangerlussualiaatissagamik, timmisartorsuaqanngippat aallarussisussamik? Talittarfik sumut atussagami, takornariat nunanit allaniit sinerissamut umiarsuarlutik angalasussat tikittarunnaarpata ?

Tamakku tamaasa ilanngullugit, aaliangiineq niaqoq unermillugu aaliangiineruvoq.

Agathe Fontain
Sisimiuni Inuit Ataqatigiit

 

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl