Pisortat kigutileriffiini bøjlelersuiunnaartoqarneratigut meeqqat ilaqutariillu akissaatikinnerusut inuuniarnikkut peqqissutsikkullu eqqugaassapput, taamaalilluni nunatsinni innuttaasut suli naligiinnginnerulernerannik kinguneqassalluni. Tamanna akueriinnarneqarsinnaanngilaq.

Nunatsinni meeqqat tamarmik qanorluunniit tunuliaqutarunik peqqissutsikkut assigiimmik pineqartussaapput. Pisortat kigutileriffiini bøjlelersuiunnaartoqarneratigut meeqqat tamarmik assigiimmik pineqarnissaannut pisinnaatitaaffiat unioqqutinneqarpoq, tamannalu akuersaarneqarsinnaanani.  

Kalaallit Nunaani kigutinut nakorsassaaleqinerup eqqugassai amerlapput. Naalakkersuisut annertusisamik qanoq iliuuseqartariaqarput, nunatsinnilu kigutinut nakorsassaaleqinerup annertusiartortoq akiorniarlugu suligasuartoqartariaqarluni. Saqqummiunneqartoq tunngavigalugu, Pisortat kigutileriffiini bøjlelersuiunnaarnerup kingunissai erngumassutigaagut. Tassami ilaqutariit meerartallit ulluinnarni inuuniarnerannut sunniuteqarnerluttussanngorpoq, bøjlelertinnermi akit taaneqartut annertoorujussuusut takuneqarsinnaammat.

Naalakkersusisut kaammattorusuppagut pisortat kigutileriffiini pitsaasumik aaqqiissutaasinnaasumik ujartueqqullugit, ilisimaneqarpormi nunatsinni kigutinut nakorsassaaleqisoqartoq. Illoqarfinni minnerni nunaqarfinnilu kigutileritissagaanni periarfissat killeqareeqisut pitsaanerusumik aaqqiisoqarnissaa qulakkeerneqartariaqarpoq.

Meeqqat inuusuttuaqqallu kigutigissuunissaat pingaartipparput. Taamaattumik pisortat kigutileriffiini kigutit nakorsaanik atorfinitsitsiniartarnermi unammilligassat eqqarsaatigalugit tunniutiinnarsimasutut pissuseqarneq atorunnaarlugu pitsaasumik aaqqiisoqassasoq piumasaraarput, bøjlelersuisarneq sukkulluunniit meeqqanut inuusuttunullu naligiissitsilluni periarfissaajuaannarnissaa qulakkeeqqullugu.

Mikivsuk Thomassen, Aqqa Samuelsen, Stine Egede.

Inatsisartuni Ilaqutariinnermut Peqqissutsimullu ataatsimiisitaliami ilaasortat.