Perorsaasut inunnillu sullissisut inuiaqatigiit naleqartillissuk

Perorsaasut inunnillu sullissisut inuiaqatigiit naleqartillissuk

Inuit Ataqatigiit perorsaasut inunnilu isumaginninnermi suliaqartut inuiaqatigiinni naleqartitatigut minnerunngitsumillu naalakkersuinikkut pingaarnersiuinermi ilaanissaat kissaatigaat.

Inuit Ataqatigiit Inatsisartuni Peqqissutsimut Ilaqutariinnermullu Ataatsimiititaliami ilaasortaatitaat Aqqa Samuelsen-ip tamanna ima itisilerpaa:

“Siunissami namminiilivinnissamut inuiaqatigiit piumasaqaataat naapertorlugit meerartatsinnut piginnaasassanik pisariaqartinneqartunik, pingaarnertut assersuutigineqarsinnaapput meerartatta imminnut tatiginissaat, imminnut naleqartutut misiginissaat, sassarsinnaaneq minnerunngitsumillu nammineersinnaalernissaat perorsaanermi pigiliutsitsiniarnikkut atugarissaarnissamullu ineriartortitsisuummata. Meerartavut inuiaqatigiinnut appakaatinnginnerini inuiaqatigiittut ataatsimoorluta meeqqerivinnilu “ivassavagut” siunissami inuiaqatigiinni sunniuteqarluarlutik inuulernissaat qulakkeerniarlugu.”

Tamannalu tunngavigalugu maanna meeqqerisussaaleqinermi ajornartorsiuteqarnitta ilorraap tungaanut saatinnissaannut Inuit Ataqtiigiit peqataaffigerusuppaat. Matumanilu perorsaasut inunnullu sullissisuusut atugarisaat politikkikkut qiviarneqartariaqarput. Tamatumunnga Aqqa Samuelsen ima oqaaseqarpoq:

“Inatsisartut inatsisiliaat kommunenit malinneqartut naammattumik naammassineqarsinnaanngippata allatut iliuuseqarsinnaanissamut ammanerusariaqarpugut. Nunatsinni meeqqerivinni pikkorissunik sulisoqalernissaq anguniarlugu Nunatsinni Perorsaasut Kattuffiat minnerunngitsumillu angajoqqaat meeqqerivinni atugassarititaasunut pitsanngorsaanissamik oqariartortuarnerat tusaaneqartariaqarpoq.”

Matumani meeqqerivinni tiimimusiaqarlutik sulisuusut atugarisaat amma nalilersoqqittariaqartut Inuit Ataqatigiit isumaqarput. Politikkikkut inuit atugarisaannut samminninnerusariaqarpugut. Tamaaliornikkut inuiaqatigiit ulluinnarni atugaannut iserluta suleqatiserinnissagatta.

 

Inuit Ataqatigiit sinnerlugit Inatsisartuni ilaasortaq

Aqqa Samuelsen

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl