Partii Naleqqap pilersinneqaqqaarnerminiilli suaartaatigiuarsimavaa ”partiini tamani saamerliunersaavugut” ”Allanik saamerliuniaqanngilaq” ”Sanngitsoortatsinnik isorliunerusunilu kisitta illersuisuuvugut” ”Uranimut naaggaarpugut” Il.il.

Piffissamili kingullermi nipi Partii Naleqqaminngaaniit allaanerungaartoq tutsiutalersimasoq maluginiagassaavoq; uranimut naaggaartuunertik apeqqusersulersimavaat, minnerunngitsumillu piffissami kingullermi aningaasaqarnermut naalakkersuisup Pele Brobergip Partii Naleqqameersup oqariartuutaa paatsuunganarpoq.

”Ingerlatseqatigiiffiit  akileraarutaat affaannanngortinneqassaaq.”

Qularutigineqanngilaq ingerlatseqatigiiffiit tamakkiisumik ilaannakortumilluunniit inuiaqatigiittut pigisavut inuiaqatigiinni innuttaasut atugaannut qitiusumik inissisimasuummata, inuiaqatigiinnilu avinngarusimanerusuni atukkatigut illersorneqarsinnaasumik ingerlatsinissamut qulakkeerinneqataammata. Taamatuttaarlu namminersortut nunatta karsianut  aamma akileraaruteqartarput.

Partiip Naleqqap akileraarutip affaannanngornissaa anguniarpagu taava partiip qanoq sinerissami kiffartuussinissamut akissaqassanersugut qulakkeerniarneraa? Aningaasallu suminngaanniit partiip aaneqassasut takorloorpai? Aningaasaqarnikkummi aqutsineq isertitsissutaajumaartunik ilisimanngisatsinnik naatsorsuuteqarluni ingerlanneqarsinnaanngilaq.

Hans Enoksen sumiippit?

2015-mi nunatta karsiata suliffeqarfiit akileraarutaasigut 262,9 mio.koruunit isertissimavai.

Apeqquteqaateqarnitsigut ilisimavarput  ingerlatseqatigiiffiup procenti ataaseq qanoq naleqarnersoq.

Paasisagullu kingulliit naapertorlugit 1 procent-i ukiumut 8,7 mio.koruuniniit 12,5 mio.koruunit akornanni naleqarpoq. Tassa taava imaalerpoq aningaasaqarnermut naalakkersuisup pilersaarutini piviusunngortissagaluaruniuk, ullumikkut akileraarut 30%-usoq affaannanngorlugu 15%-mut appassuguniuk taava tamanna ukiumut 132 mio.koruuninik nunatta karsianut naleqassaaq, ukiunullu sisamanut 528 mio.koruuninik naleqassalluni.

Pele Brobergimut apeqqutigerusupparput suut sipaarutaassanersut nunatta karsiata ukiuni sisamani 528 mio.kr aannaasaqaatigisalissappagit? Suut pilliutaassappat? Aamma qanoq qulakkeerumavaa aningaasat isertitat ikilissanngippata allatigut isertitsinissaq? Akileraarutip affaannanngortinneqarpat qanoq sinerissami kiffartuussinermut sunniuteqassava?

Missingersuusiortarneq pillugu inatsit naapertorlugu qinikkatut akisussaassuseqartut sipaakkat allatigut qanoq matussuserneqarnissasut siunnersuuteqartussaavoq. Matumani tamanna qulakkeerneqarpa?

Naggataatigullu apererusunnarsivoq partiip siulittaasua Hans Enoksen sumiinnersoq.  Hans Enoksenip partiip aallartissimasami talerpimmut sangoriangaatsiarsimanera isumaqataaffigisinnaanerpaa? Minnerunngitsumillu apeqqutaalerpoq Aningaasaqarnermut Naalakkersuisup talerperliunerungaatsiartumik anguniagaqarnera  partiiminiit politikkikkut tapersersorneqarnersoq?

 

In.in.

Peter Olsen
Inuit Ataqatigiit