Partii Naleqqap ulluni kingullerni ninngannera nuannareqqusaaginnarnermik aallaaveqarpoq. Nuannareqqusaarnerlu taanna nunatsinnut namminiilivinnissatsinnulluunniit iluaqutaanngilaq.

Nuannareqqusaarneq maannamut ippassaq pisumi annerpaaffimminiippoq, Partii Naleqqap siulittaasuni siuttoralugu Kim Kielsenip Lars Løkke Rasmussenillu atsioqatigiinniarnerannut akerliussutsimik takutitsinissamik aaqqissuussineranni.

Aap, atsioqatigiinniarneq isiginnaagassiatullusooq aaqqissugaanera apeqqusigassarujussuuvoq, tamassumalli allaluarnermik nuanninngilluinnartumillu nilliasajoornissamut akuersaaginnartitsinngilaq.

Nunaqqatitsinnut tikeraanullu allaluarnermik oqariartuuteqarneq akuersaanngilluinnarlugu oqaatigiumavara.

Killiligaanngitsumik oqaaseqarsinnaatitaanermut ilaavoq akisussaaffeqarneq. Uumissuinnginnissamut akisussaaffeqarneq akaareqatigiinnissamullu akisussaaffeqarneq. Akisussaaffik tamanna Partii Naleqqap ippassaq qimarratigaa, soorlu aamma naalakkersuisooqatigiinnermi akisussaaffimminnik qimarratiginnittut. Partiimini taama akerliussutsimik takutitsinermi pissuseqarnermik akuersaarnani oqariartunngikkuni Hans Enoksen akisussaaffimminik suli annertunerusumik qimarratiginnissaaq.

 

Sara Olsvig

Inuit Ataqatigiit siulittaasuat