Sermitsiami saqqummersumi kingullermi atuarneqarsinnaavoq Siumut siulittaasuata aatsitassarsiornerni royalty-mik piumasaqarnertik imaaliallaannaq atuutilernavianngitsoq.

Allatut oqaatigalugu maannakkut oqariartuutigineqarpoq taamaallaat nutaanut aatsitassanik ujarlernermi piaanermillu isumaqatigiissutinut atuutissasoq, taamaalilluni maannamut isumaqatigiissutaareersimasut unioqqutinneqannginniassammata.

Inuit Ataqatigiit-niit isumaqarpugut taama allanngorartigisunik nalunaaruteqaqattaarneq nalornisitsisorujussuusoq, maannakkullu Siumut siulittaasuata oqaatigaa paatsoorneqarsimalluni. Tamannali paasilluarsinnaavarput, tassami Siumukkut qineqqusaarnermi royaltymut politikkiat sunaanersoq paasiuminaatsorujussuummat. Pineqartoq pingaartorujussuuvoq, tassami nunatta aatsitassarsiornermut politikkia pineqarmat. Eqqartorpagut nunat tamalaat akornanni suliffeqarfissuit isumaqatigiinniallaqqissorujussuit, taamaattumik pingaaruteqarpoq qanoq avammut oqariartuuteqarnissaq. Taamatuttaaq aamma pingaaruteqartorujussuuvoq piareersarluarsimanissaq.

Siumukkunnit oqaatigineqartaraluarpoq Isuani saviminissamik piiaasoqalerpat ulloq siullermiit royalty-mik akiliisoqartalissasoq – uffalu Siumukkut namminneq misissuinissamik akuersissut 1995-imi tunniuteqqaaramikku kiisalu 2005-imi London Mining-imut ingerlateqqinneqarmat aningaasatigut atugassarititaasut taamani akuersissutigereerlugit.

Akissutissanik amigaateqarpugut – imatut paasisariaqarnerluni Isua-ni saviminissamik piiaanissamut misissiunermi aningaasatigut royalty-mullu tunngasut nutaamik aaqqissuunneqassasut. Inuit Ataqatigiit-niit oqaatigiuarparput Isua-ni suliat annertoorsuartut aaqqissuussaq siulleq aallartippat royalty-mik piumasaqarniarata. Aamma oqaatigiuarparput maannakkut aatsitassarsiornermi inatsimmi periarfissaareersoq royalty’p atuutilertinneqarnissaa. Taamaattumik inatsisinik allanngueqqaarnissaq pisariaqanngilaq, taamaallaalli politikkikkut siunertaqarlunilu pilersaarusiornermiippoq.

Siumup siulittaasuata Sermitsiami ilanngullugu oqaatigaa, siunissami qanoq aaqqissuussiniarnerlutik sukumiivallaamik oqaatigiumanagu. Ilulissani KNR-ip qineqqusaartitsinerani TV-ikkut oqaraluarpoq royalty 10%-iussasoq. Suna 10%-eerutigissavaat – taanna atuutissava apeqqutaatinnagu aatsitassaq sunaanersoq aammalu aatsitassap nalinga apeqqutaatinnagu?

Inuit Ataqatigiit-niit erseqqissumik oqaatigaarput royalty avataani uuliasiornermi atorneqassasoq. Taamatuttaaq siunertaraarput Qeqertarsuatsiaat eqqaanni rubinisiornermi royalty atorneqassasoq. Ersarissuliuutigisarparput inatsimmi royalty periarfissaq mianersorluni atorneqassasoq, atorneqarneranilu pissarsiassaq annerpaaq siunertarineqassasoq.

Siumup partiillu allat tunngavilersuutaat tangeerupput. Kisiannili nuannaarutissaavoq massakut aamma allanit takuneqarsinnaalermat periutsit ullormiit ullormut allanngorartinneqarsinnaanngitsut, Inuit Ataqatigiillu siunnerfiat eqqortuusoq.

Nunatsinni tamarmiulluuta apeqqutini taamaattuni isumaqatigiissuteqarnissarput pingaaruteqarluinnartutut isigaarput. Naalakkersuinikkut patajaassuseq nunanit allanit aningaasalersuisussarsiornermi aalajangiisuulluinnartarpoq.

Inuit Ataqatigiit-niit royalty’p atuutilersinneqarsinnaanera akerlerinngisaannarsimavarput – paarlattuanilli oqartuarpugut piffissaq eqqortoq nallerpat taamaaliortoqartariaqartoq.aalajangiisussaq tassaassaaq aatsitassaq suna pineqarnersoq sunalu piviusorsiortuunersoq.

Aamma isumaqarpugut aatsitassarsiornermi akileraartsitseriaaseq sammineqartuartariaqartoq. Tamannarpiarlu pissutigalugu immikkut ilisimasalinnik suleqatigiissitaliorpugut akileraartarnikkut siunnersuisartussanik – taamatullu aamma aatsitassarsiornermi periuserisarput ukiuni kingullerni 20 – 30-nngortuni nalilersuiuarnikkut nallersuussiuarnikkullu aalajangiussaalluni.

Taamaammat apeqqutigisariaqartoq tassaavoq; Siumut suniartoruna?

Neriuppugut aamma kissaatigaarput partiit tamarmik ataatsimut isumaqatigiissuteqarnissatsinnut peqataajumassasut, soorlu 2009-mi tamatta isumaqatigiilluta aatsitassanut inatsit tassunga atasumik periusissarput aalajangiukkigut. Inuussutissarsiutinik nutaanik aallartittoqassapppat tamanna pisariaqavippoq.

Ikinngutinnersumik

Inuit Ataqatigiit Inatsisartunut qineqqusaartitaat