Paasisitsiniaasoqarlunilu inunnik taasisitsisoqarli

22. oktober 2013
Demokraatit Inuillu Ataqatigiit:

Paasisitsiniaasoqarlunilu inunnik taasisitsisoqarli

Atortussianik qinngornernik ulorianartunik akulinnik akuersaanngilluinnarneq atorunnaarsinneqassanersoq atorunnaarsinneqassannginnersorluunniit Demokraatit Inuit Ataqatigiillu isumaqatigiinngissutigivarput. Isumaqatigiippugulli pingaarnerusoq tassaasariaqarmat innuttaasunik peqataatitsillunilu tusarniaasoqarnissaa. Maannamut taamaasiortoqanngilaq. Taamaammat ataatsimoorluta piumasaraarput pimoorullugu paasisitsiniaasoqassasoq nuna tamakkerlugu inunnik taasisitsinermik malitseqartumik.

Atortussianik qinngornernik ulorianartunik akulinnik akuersaanngilluinnarnerup atorunnaarsinneqarnissaanut atatillugu maannamut pisartut kanngunarlunilu tataannarluinnarput.

Siullermik Naalakkersuisut Inatsisartuni naapigiaasoqarnissaanik innuttaasunillu tusarniaanissamik misileeqqaanngiivillutik aalajangernissaq tuaviupiluutigisimavaat. Martsimi qinersinermi innuttaasut tusarniaaviginerarneqarsimanerannik aammalu ukiuni kingullerni amerlasuuni apeqqut pillugu oqallittoqarsimaneragaanermik tunngavilersuutigineqartut akuersaanngilagut. Akuersaanngilluinnarnissamik politikkeqarnerup atorunnaarsinneqarnissaa pillugu paasisitsiniaasoqarsimanngisaannarpoq aammalu internetikkut allagaatigineqartut ukiunik sisamanik pisoqaassuseqartut tuluttuinnaq allagaasut innuttaasunut paasissutissiinertut taassallugit isumarput malillugu mitalliinerulluinnarpoq.

Inatsisartuni suleriaatsit nalinginnaasut unioqqutillugit partiit Naalakkersuisuutitaqartut ataatsimiititaliamut suliarisassanngortitsinaveersaarnerat uagutsinnut tupannangaarsimavoq. Akuersaanngilluinnarnissamik politikkeqarnerup atorunnaarsinneqarnissaa pillugu aalajangernissaq oqaluttuarisaanermi imaannaanngitsuusussaavoq taamaammallu Inatsisartuni isumaqatigiinngittoqarnera pillugu siunnersuutip kingunissai paasisaqarfigiumallugit isumaliutissiissusiortoqartariaqarluni. Tassunga atatillugu tissinaannarporluunniit tusarnaarlugu Partii Inuit Inatsisartuni ilaasortaatitatuaat isumaqataanngilluinnartoq sinnerlugu Siumup oqaaseqartartua saqqummiisoq. Uagut paasiuminaatsipparput sooq Naalakkersuisusooqatigiit siunnersuut ataatsimiititaliamut suliarisassanngortinneraat. Tassami immikkoortup ataatsimiititaliami piviusumik suliarineqarnissaa Naalakkersuisooqatigiit minnerpaamilluunniit soqutigisimanngilaat. Siunissami nunatsinni uranimik piiaasoqalerlunilu avammut tuniniaasoqalernissaa pillugit danskit Folketingimi ilaasortaattulli assigiimmik ilisimasassinneqarnissatsinnik noqqaanerput partiinit Naalakkersuisuutitaqartunit Naalakkersuisunillu namminernit itigartinneqarpoq. Suliamut matumunnga atatillugu danskit politikerit uagutsinninngarnit ilisimasassinneqarnerunerat ajorsitsaarineruvoq angisooq.

Uran pillugu oqallinneq malinnaaffigisimagaanni taamatut ilisimasaqarnerunissamik paasissutissinneqarnerunissamillu noqqaanerup itigartinneqartuarnera suli paasiuminaannerulerpoq. Tassami oktoberip 24-ani sunarpiaq taasissutigineqassanersoq Naalakkersuisooqatigiissuni amerlanerpaat nalugaat erseqqilluinnaqqissaarpoq. Allaammi Aatsitassaqarnermut Naalakkersuisup nammineerluni siunnersuutini paasisimanngilaa. Aatsaammi oktoberip 20-ani Aatsitassanut ataatsimiititaliami ataatsimeeqateqarnermik naggataatigut nassuerutigaa siunnersuut uranip saniatigooralugu pissarsiatut piiarneqarnissaanut tunnganngimmat. Taasinissamut ullut sisamaannanngortullu taama nassuertoqarpoq isumaliutissiissutip ilassutaani piluusaarluni aatsaat nanineqarsinnaasumi. Torrallaanerunngilaq.

Taamaammat taasissutissap sumut tunnganera kikkut tamat paasisinnaasaannik matumuuna erseqqissumik nassuiassavarput. ANGERAANNI isumaqarpoq atortussiat qinngornernik ulorianartunik akullit suulluunniit, uran ilanngullugu, piiaarneqarsinnaanngorlutillu avammut tunisassiarineqarsinnaanngussammata. NAAGGAARNEQ isumaqarpoq akuersaanngilluinnarnissamik politikkeqarneq atorunnaarsitaassanngimmat. Takisuuliuutiginagu tassa taamaappoq.

Naalakkersuisut siuliisagooq akuersaanngilluinnarnissamik politikkeqarnermik atorunnaarsitsimaneragaanerannik partiit Naalakkersuisuutitaqartut uteqattaarlugu salluliuutaat Demokraatinit Inuillu Ataqatigiinnit aamma annilaarutigaarput. Ullumeqqinnaaq marlunngornermi oktoberip 22.-ani 2013 naalakkersuinikkut isumaqatigiinneqarpoq atortussianik qinngornernik ulorianartunik akulinnik piiaaneq avammullu tunisassiorneq inerteqqutaasoq. Taamatut akuersaanngilluinnarnissamik politikkeqarneq 1988-imiilli atuuppoq. Tamanna pillugu ulloq manna tikillugu uranimik piiaanissamut akuersissummik tunisisoqanngisaannarnikuuvoq maannalu tamanna pissutaavoq Naalakkersuisut tamanna pillugu Inatsisartut isumaannik allanngortitseqqusinerannut.

Akuersaanngilluinnarnissamik politikkeqarnerup atorunnaarsinneqarnissaa pillugu Inuit Ataqatigiit Demokraatillu assigiinngitsorujussuarmik isumaqarpugut qinigaaffiullu siuliani apeqqut taanna isumaqatigiissutigilersinnaasimanagu. Akuersaanngilluinnarneq atorunnaarsitaasimasuugaluarpat Demokraatit qiimmattaatigisimassagaluarparput ukiunilu pingasuni apeqqut taanna pillugu nipaarsaartariaqarsimanavianngikkaluarluta! Uranimik piiaanermik avammullu tunisassiornermik maanna Naalakkersuisuusut ammaassiniarnerat taakkuullutik akisussaaffiginiarlissuk. Aalajangernermulli tamatumunnga akisussaaffimmik Naalakkersuisut siuliinut tutsitsiniarsarineratik akisussaaffik Naalakkersuisooqatigiit namminneerlutik tigusariaqarpaat.

Taamaammat partiini Naalakkersuisuutitaqartuni ilaasortaasunut tamanut paasinartumik apeqqutissaqarpugut neriulluta akisinnaasassinnik: Qanoq ilillusi isumaqarsinnaavisi apeqqut pillugu innuttaasut naammattumik qaammarsaaffigineqartut ilissili politikeritut qinikkatut nammineerlusi nalugussiuk taasineq sumut tunngassanersoq tamatumalu kingunissai suussanersut nalugussigit?

Naatsumik oqaatigalugu tamakku tunulequtaapput Demokraatit Inuillu Ataqatigiit allannguutissatut siunnersuuteqarnitsinnut, taannalu akuersaanngilluinnarnissamik politikkeqarnerup atorunnaarsinneqarnissaa pillugu nuna tamakkerlugu inunnik taasisitsisoqarnissaanut tunngavoq, taannalu sioqqullugu nalunaarusiat paasissutissallu arlaannaannulluunniit attuumassuteqanngitsut toqqammavigalugit kiisalu inuit immikkut paasisimasaqartut arlaannaannulluunniit attuumassuteqanngitsut peqataaffigisaannik pimoorullugu paasititsiniaasoqassasoq.

Naggataatigut Inatsisartunut ilaasortat eqqaasikkusuppagut pineqartoq tassaammat tunngaviusumik aalajangerneq taamaammallu ilaasortat kikkulluunniit pisussaaffeqarmata tarnip nalunngissusia atorlugu taasinissamut. Partiimik qalipaasersuineq apeqqutaatinnagu. Isummerit isummallu ilumoorfigalugu.

Immitsinnut innuttaasullu akiitsoqarfigalugillusooq taama pisussaavugut

Inuit Ataqatigiit Demokraatillu sinnerlugit,

Inussiarnersumik inuulluaqqusilluta

Jens B. Frederiksen og Kuupik V. Kleist

demo_IA_logo

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl