Allattoq: Aaja Chemnitz Larsen, Folketingimi ilaasortaq

Paasisimasaqarluaqqissaartuuneq aaliangiinernut tunngaviusartussaavoq

Ministeriunertut qineqqusaartut marluullutik Kalaallit Nunaanni annerusumik nunanut allanut politikkikkut sunniuteqarnerusoqarnissaa oqaatigaat oqarlutillu isertukkanut eqqartuinerit pitsanngorsarneqassasut. Taamatut oqalunneq oqarluartaarnerinnaanerpa qanorlu Kalaallit Nunaanni qinikkanut akuutitsinissaq pimoorunneqartigiva?

AG-mi apriilimi Socialdemokraatit siulittaasuat Mette Frederikseni apersorneqarnermini oqarpoq Kalaallit Nunaat annerusumik nunanut allanut sammisaqartoqartillugu piginnaalersitsisoqassasoq. Malugiuk Sillimaniarneq- aamma Illersornissaqarfik tassani eqqaaneqanngimmata. Tassami Sillimaniarnermut Illersornissaqarfimmullu tunngasut arlaleriarlutik Kalaallit Nunaata nammineq iliuuseqarsinnaaneranut akimmisaartitsereerput, ass. mittarfiit, nunatta Kangilinnguani atorneqarnera pineqartillugu imal. dual-use-nut sanaanik avammut tunisinernut aamma unittuussutaasarnikuullutik. Tamakkununnga tunngasunut Kalaallit Nunaata sunniuteqaqataanera taamatut inerneqarallaqqavoq.

Mette Frederiksenip oqaasii itisilerneqartariaqaraluarput minnerunngitsumillu qanoq isumannaallisaanermut politikkip iluani neriorsuineq Kalaallit Nunaanni aaliangerneqartuni unammillernartunut tunngatillugu iliuuseqarfigineqassanersoq erseqqissarneqartariaqarluni.

Lars Løkkep folketingip ukiuani maanna atuuttumi ammaanersiorluni oqallitsitsinermini Kalaallit Nunaata nunanut allanut politikkimut piginnaalersitsineqarnerunissaa neriorsuutiginikuuaa neriorsuillunilu DFG-mut aaqqissuussinermi (Danmarkip, Savalimmiut Kalaallit Nunaallu suleqatigiinneri pillugit) inissaqartinneqarnerussasugut. Maajimi ukioq manna neriorsuivoq nutaamik naalakkersuisortaarnerup kingorna Naalakkersuisuni siulittaasumut isertukkanik eqqartuinerni annerusumik ilaatitsisoqartalissasoq.

Isertukkanut eqqartuinernut ammanerunissaq piffissanngorpoq taamaaliorniarnermili piumasaqaatit marluk malinneqassapput:

1. Kalaallit Nunaannit folketingimi ilaasortat Udenrigspolitisk Nævn-imi aaliangersimasunik inissinneqartariaqarput tassani nunanut allanut- isumannaallisarnermullu politikkit isertuuttumik eqqartorneqartarmata.

2. Naalakkersuisuni siulittaasup Naalakkersuisut matoqqanerujussui unitsittariaqarpai ataatsimiititaliallu pisariaqartinneqartut ilanngunneqartarnissai naammattumik qulakkeertarlugu.

Folketingimi Inatsisartunilu qinikkat Lars Løkke Rasmussenip isertukkat pigineqartut eqqaasariigaanut paasisaqarsinnaatitaasariaqarput.

Ilisimasaqarneq pissaaninitsitsisarpoq

Ajornartorsiut marloqiusaavoq. Danmarkip illuatungaatigut Kalaallit Nunaat kalaallillu qinikkat ilanngutinngippallaartarpai. Akerlianillu Naalakkersuisut paasisimasatik kisimiillutik pigerusullugit. Danmarkimi Kalaallit Nunaannilu isummertarnerit allanngortinneqartariaqarput.

Arlaleriarluta piiaaffinnut tunngasunut, timmisartoqarfinnut tunngasunut nunanilu issittuni umiarsuarnut aqqutissanut tunngasunut Danmarkip aaliangeeqataaffigerusuttaraa takusareerparput – taamatullu pisoqartillugu qanoq naalagaaffiup isertugaataattut isigineqartunut Kalaallit Nunaat paasitinneqarusunnginnera takusarlugu.

Naalagaaffiup iluani politikki avissaarneqarsinnaanngillat, taamaammat statsministerinngortussap kalaallit qinikkat nunanut allanut silliniarnermullu Kalaallit Nunaannut tunngasuteqartit pineqartillugit paasisimasaqarluaqqissaarnissaat naleqqulluinnartumik iliuuseqarfigisariaqarpaa. Taamaalilluta taamaallaat Folketingimi Inatsisartunilu paasisimasaqarluarpaluttumik aaliangiisarsinnaassaagut.

Qineqqusaarnermi neriorsuutit qinersereernerup kingorna piviusunngorumaarnerpat?

Qinersinissamut ullualuinnanngorput, taamaammat isumaqarpunga Lars Løkke Rasmussenip Mette Frederiksenillu qanorpiaq qineqqusaarnermi isumaqarsimaneri paasissallugit piffissanngorsoraara.

Neriorsuutitik qinersinerup kingorna pimoorutissanerpaat, ilanngunneqarnerulissanerpugut isertukkanillu eqqartuisoqartillugu ilaatinneqarnerusalerluta? Qinersereernerup kingorna isumaqatigiinniarnernut pigutta tamakku pingaartinnerusannut ilaajumaarput.