Orsussamut atuisimanermut Naalakkersuisut akissutaat imminut assortuuttoq

Aningaasaqarnermut Naalakkersuisup benzinamut akiliummik atornerluisimanermut § 37 tunngavigalugu apeqqummut akissutaa imminut assortuulluinnarpoq. Naalakkersuisormi allalluunniit akiliutip siunertarineqanngitsumut atorneqarsimaneranut aningaasarpaalunnik utertitsisimappat, atornerluisoqarsimanera erserpoq.

Taamaammat Naalakkersuisut atornerluisoqarsimannginneranik suliamilluunniit ingerlasoqannginneranik oqariartornerat ataqatigiinngilluinnarpoq.

Naalakkersuisutut akisussaaffeqarneq pillugu inatsit erseqqilluinnarpoq. Naalakkersuisup kialuunniit allat pisuutissinnaanngilai. Inatsimmi paragraf 6-mi ima aalajangersagaqarpoq

“6. Naalakkersuisunut ilaasortaq § 10 naapertorlugu pineqaatissinneqassaaq piaaraluni imaluunniit mianersuaalliorujussuarnermigut Inatsisartut Naalakkersuisullu pillugit Inatsisartut inatsisaat inatsisilluunniit allat malillugit imaluunniit atorfimmi suunera malillugu imminut pisussaaffigisassanngortitaasut malillugit iliunngikkuni.

Imm. 2. Imm. 1-imi aalajangersagaq aamma atorneqartassaaq Naalakkersuisunut ilaasortaq eqqunngitsumik paasinerluutaasinnaasumilluunniit inatsisartunut paasissutissiisimappat imaluunniit inatsisartut oqaluuserisassamik oqaluuserinninneranni paasissutissanik oqaluuserisap inatsisartunit aalajangiiffigineqarnissaanut annertuumik pingaaruteqartunik nipangiussisimappat.”

Inuit Ataqatigiinnit Nunatta Karsiata 2017-mut Naatsorsuutaasa Inatsisartuni siullermeerneqarlutik oqalligisineqarneranni apeqqut qaqipparput Nunatta karsianit atornerluisoqannginnissaa qulakkiissallugu Inatsisartut suliassarpiarimmassuk. Nunatta karsianit atornerluisoqarnissaa uagut akuersaanngilluinnarparput.

Nunatta Karsiata Naatsorsuutaat maanna Kukkunersiuinermut Ataatsimiititaliamut suliassanngortinneqarput, ataatsimiititaliallu suliassat taama ittut qulaajassallugit suliassarivaa. Nunatta Karsiata Naatsorsuutaasa suliarineqarnerat novembarip 27-ni aappassaaneerneqartussaavoq.

Piumasaraarput suliaq Kukkunersiuinermut Ataatsimiititaliami sukumiisumik qulaajarneqassasoq ataatsimiititaliarlu inerniliussamik piariigaqariarpat Inatsisartunut ilisimatitsissasoq.

 

Múte B. Egede

Gruppeformand

Inuit Ataqatigiit