Uggornarpoq ajuusaarnarluinnarlunilu tusagassiutitigut tusarlugu nunatsinni isiginnaartitsinermik ilinniarfimmi ilinniartunit tallimaasunit sisamat atuarunnaarsimanerat, ilinniartorlu ataasiinnanngorluni.

Isumaginninnikkut unammilligassarpassuaqaleruttorfitta nalaani, namminiilivikkiartuaarnittalu aqqutaani, aatsaat taama timikkut tarnikkullu nukittorsarneqarnissarput pingaaruteqartigilerpoq. Inuiattut anersaatsigut nukittorsarumalluta suliniarnitsinni, siunertap anguniakkallu angunissaanut sakkussatta pingaarnersaasa ilagaat Nunatta Isiginnaartitsisarfia taassumalu ataani Isiginnaartitsinermik ilinniarfiup piorsartuarnissaat.  

Taamaattumik killiffik Inuit Ataqatigiinniit paasiuminaatsipparput akuersaaruminaatsillugulu.

Naalakkersuisooqatigiit, tapersersortaallu Demokraatit, Nunatta Isiginnaartitsisarfianik ukiuni kingullerni nukillaarsaasimanerisa inernerisaatut tamanna Inuit Ataqatigiinniit nalilerparput.

Naluneqanngitsutut Siumup siuttuuneratigut tamatigut isiginnaartitsisarfik sipaarniarfigineqartuartarsimavoq. Illuatungiliuttuugaluarluta ukioq manna Inuit Ataqatigiinnit aningaasanut inatsisissami peqataanitsigut aamma isiginnaartitsinermiit anersaakkut immersortuarneqartarnissarput qulakkeerusullugu allaat 3 mio. koruunit tikillugit aningaasaliinerunissamut qulakkeerinnippugut. Piorsarsimassutsikkut, timikkut anersaakkullu nukittorsaaniarluta ilungersornitsinni naalakkersuisooqatigiit Nunatta Isiginnaartitsisarfianik, taassumalu ataani Isiginnaartitsinermik Ilinniarfimmik nukillaarsaajuarnerat Inuit Ataqatigiit akuersaanngilluinnarpoq.

Isiginnaartitsinermik ilinniarfiup nukittorsarneqarnissaanut periarfissat ilagisinnaannginnerpaat ilinniartoqarfiit ilaannut ilanngunneqarsinnaanissaa, soorlu Ilimmarfimmut ilanngullugu? Tamaalilluni isiginnaartitsinermik ilinniarfimmi ilinniartitsisut ilinniartullu kiserliornermik imaluunniit “avinngarusimavallaarnermik” misigisimajunnaaqqullugit? Aamma nalunngilarput amerlanngitsunik ilinniartoqartillugu, ilinniartueruttoqarnissamut aarlerinarnerusartoq. Taamaammat aningaasaliissutinik suli amerlanerusunik anguniagaqarnissaq Nunatta Isiginnaartitsisarfianut Isiginnaartitsinermillu ilinniarfiup nukittorsartuarneqarnissaat ingerlatiinnassavarput, ilinniartitsisut sulinerminni, ilinniartullu periarfissagissaarneroqqullugit.    

Inatsisartuni ilaasortaq

Peter Olsen

Inuit Ataqatigiit