Utoqqaat inuiaqatigiinni naleqartinneqarnertik maluginerusariaqarpaat. Utoqqaat illuini atugassarititaasut pitsaanerulissapput. Aamma suliunnaarnersiuteqalersut Nunatsinniiginnarnissaat qulakkeertariaqarparput.

Taamaammat Inuit Ataqatigiit utoqqaat atugaannik allannguinissamut assigiinngitsunik siunniussaqarput.

Siullertut utoqqaat illui peqqissaavinngorlugit aaqqissuuteqqissapput, tamanna peqqinnissaqarfiup utoqqaat illuini peqqissarnissamut periarfissanik pitsaanerusunik amerlanerusunillu kommuninik suleqateqarnikkut neqerooruteqarnissamik pisussaaffilerneqarneratigut pissaaq.

Angerlarsimaffimmi ikiorteqarneq pitsaanerusoq

Inuiaqatigiinni inuit peqqissutsimikkut nukittoraluttuinnarput inuunertusiartorlutillu. Taamaammat siunissami utoqqaat suli amerlanerit sivisunermik namminneq najugaqarfimminniittarnissaat naatsorsuutigaarput. Ullumikkummi takusinnaareerparput utoqqaat pisariaqartitsilivikkaangamik aatsaat utoqqaat illuinut nuuttartut.

Taamaammat ersarissumik ineqarnermut politikkeqassaagut, utoqqarnut inissiat amerlanerussapput utoqqaallu ataatsimoorlutik ineqaqatigiiffissaannik periarfissiilluta.

Ilutigisaanik utoqqalinersiuteqartunut nammineq illuutilinnut inissiaatilinnullu ikiorsiissutaasinnaasunik pilersitsiniarpugut, kiisalu angerlarsimaffimmi ikiorteqarnissamut periarfissanik sinaakkutinillu pitsanngorsaassalluta.

Aanaakkut aataakkullu Nunatsinni periarfissagissaarlik

Innuttaqativut amerlavallaartut suliunnaarnersiuteqalernerminni Nunarput qimallugu nunamut allamut nuuttarput. Inuttut piginnaasarpassuit pisuussutillu nunatta pisariaqartitai nunatsinniiginnarnissaat pillugit immikkut suliniuteqartariaqarpugut.

Nunani avannarlerni allani pissutsinut annertunerusumik sanillersuunneqarsinnaasunik periarfissiisariaqarpugut. Tamaammat tunngaviusumik utoqqalinersiat pisariaqartitsinerpaanut qaffasinnerunissaat sulissutigissavarput. Inuit Ataqatigiit utoqqalinersiat atugarissaarnikkut ikiorsiissutitut isigaavut kikkullu tamarmik toqqissisimasumik inuuniuteqarsinnaanissaannut qulakkeerinnittussatut isigaavut. Tamanna isumaqarpoq utoqqalinersianik inuttut ataqqinassusilimmik kikkut tamarmik inuuneqarnissaannik tunngavissiilluta annertussutsikkut inissittariaqarivut.

Utoqqaat tamarmik naleqarlutik Nunatsinni inuussapput.

Aqqaluaq B. Egede, Inuit Ataqatigiinni siulittaasup tullia