Allattoq: Aqqaluaq B. Egede, Inuit Ataqatigiit, politikkikkut oqaaseqartartuat

Nunatsinni annaassiniarnermik suliallit ilaat kalaallisut oqaaseqartartuusariaqarput

Inuit Ataqatigiit isumaqatigilluinnakkatsinnik Danskit Illersornissamut ministeriat oqaaseqarmat tunuliaqutserparput. Oqaasiinnaassannngippat Naalakkersuisut aamma danskit Illersornissamut ministeriata nunatsinni annaassiniartartut sulinerminni kalaallisuinnaq oqaaseqartunik oqaluussisinnaanissaat piumasaqaatigisariaqarpaat. Nunatsinni ajunaartartut ikinnerpaaffissaminniissappata annaassiniarnermi oqaatsit atorlugit paaseqatigiissuteqarsinnaaneq aalajangiisorujussuusoq assut pingaartinneqartariaqartoq.

Inuit Ataqatigiit sinnerlugit Folketingimut ilaasortaq Aaja Chemnits Larsen-ip piumasaqaatai tamakkiisumik taperserpagut. Oqaatsit atorlugit paaseqatigiissinnaanissaq annaassiniartut annaanniarneqartullu akunnerminni sakkussaattut pingaartutut inissisimapput. Nunatsinni sineriattoqisumi nunat imartallu aqqi danskisut kalaallisullu assigiinngitsunik atsersorneqarsimasuupput, taaguusersueriaatsillu nunatsinni kalaallisut oqaaseqanngitsunut unammillernartuusinnaasarlutik. Imaappoq, oqaatsit atorneqartut annaassiniarnerup iluatsittumik ingerlanneqarnissaanut aalajangiisorujussuanngorput taamaattumillu isiginngitsuusaarneqartariaqaratik.

Inuit Ataqatigiit nunatsinni Naalakkersuisunut kaammattuutigaarput annaassiniartarnermi piumasaqaatit aamma kalaallit oqaasiinik atuinissamik piumasaqaatinik minnerpaaffiliinissaq siunertaralugu sulissuteqaqqullugit. Nunatsinni inuit kalaallisuinnaq oqaasillit illersorneqarnissaat aamma Naalakkersuisutigoortumik suliaralugu piumasaqaatinngortariaqartoq isumaqarpugut. Suliassaq annertunngilaq, nunatta inuisalu illersorneqarnissaat naalagaaffeqatigiit akunnerminni ataatsimut soqutigisassaraat naammassineqaannartussaq.

Maannamut misilittakkat aallaaviugalugit nalunnginneqareerpoq annaassiniartarnermi qanoq pingaaruteqartigisoq, annaassiniartut annaanniarneqartullu imminnut oqaloqatigiissinnaasarnerat. Annaassiniartarneq nunatsinni iluatsittumik ingerlassappat misilittakkat pitsaasut isumaqatigiissummi ilanngullugit aalajangersakkatut isumannaarneqartariaqarput. Tamatumani pingaartunut ilaavoq oqaatsitigut paaseqatigiissinnaanissamut tunngassuteqartoq.

Inuit Ataqatigiit sinnerlugit taamak nunatsinni Naalakkersuisut aammalu danskit Illersornissamut Ministeriata akornanni suliat peqqissaartumik qarsupinngitsumillu ingerlanneqarnissaat piumasaraarput. Neriulluta suliassaq pingaarutilik avaqqunneqarsinnaanngitsorlu pitsaasumik naammassineqarumaartoq, aamma nunatsinni inuit kalaallisuinnaq  oqaasillit piumasaqaatitigut naleqartinneqartariaqarmata illersorneqartariaqarlutillu.

Share and Enjoy !

0Shares
0 0 0