Inuiaqatigiiuvugut aamma allamiunik ilallit. Nunarput ineriartortuarsimavoq danskit peqatigalugit, nunaqqatigalugit ilaqutaralugillu. Danskit ilarpassui kalaallisut oqalulersinnaanngortarput, amerlanertigulli kalaallit danskisut ilikkartarput. Meeqqat atuarfiani meeqqat danskisut ilikkarsimasussaapput, ilinniarfinnut allanut ingerlaqqinniarunik. Ilinniarfinnili aamma ilinniarsinnaapput kalaallisut ilikkarsimanngikkaluarlutik. Unali qularnanngilaq. Pisariaqarpoq nunaqqatigiittut kalaallisut qallunaatulluunniit oqaasiliugaluarutta immitsinnut paasisinnaanissarput. Kalaallit qallunaatut ilikkarniarunik paasinninniaraluarlutilluunniit atuarfimmi ilinniarfimmiluunniit ilikkarsinnaapput. Danskilli kalaallisut ilikkarniarunik ilinniarfissaminnik amigaateqarsinnaasut paasinarput.

Nuna allamiut oqaasiinik allataannillu paasinninniaraangatta maanna ajornanngilaq Google translate atorlugu danskisuunngortitsisinnaaneq, tamannalu iluaqutaasaqaaq. Danskilli kalaallisut allatanik paasinniarunik Google translate atorlugu kalaallit oqaasii danskisoortiinnarsinnaanngilaat. Taamaalillutik kalaallisut allasimasunik paasisaqarniarunik inunnit allanit nutserunneqartariaqarlutik. Tamanna naapertuutinngilaq. Nunaqqatigiilluta immitsinnut ajornannginnerusumik paasisinnaasariaqarpugut.

Oqaasileriffik kalaallit oqaasiinik suliaqarfiuvoq. Kalaallit oqaatsitta ineriartornissaat, allattaatsip ajunnginnissaa, oqaatsillu nalunaarsornissaat isumagissavaat. Aammattaaq ordbogiliorneq suliarissavaat. Orbogiliorneq suliassat pingaarnersat ilagaat. Ordbogit naqitat atorluartarpagut. Sulili ineriartortittariaqarparput qarasaasiakkut oqaatsitta nutserneqarsinnaanissaat. Allamiut allatatsinnik paasinnissinnaanissat digitalimik ordbogiliornikkut ineriartortittariaqarparput.

Aningaasanut inatsisissami siunnersuutigineqarpoq ordbogiliornermut aningaasat ukiumut immikkoortinneqartartut unitsinneqarnissaat. Tamanna Inuit Ataqatigiinniit akuerisinnaanngilluinnarparput. Suli pisariaqarteqaarput oqaatsitta ineriartortinnaqarnissaat, tamanit paasineqarsinnaanissaat, aammalu oqaatsitta naqitanngorlutik nassuiarsinnaanissaat. Taamaammat akuerisinnaanngilluinnarparput Naalakkersuisut aningaasanut inatsimmi ordbogiliornermut aningaasaliissutit unitsinniarmatigit. Kipitsuitsuminguna oqaatsitta paasineqarlutillu atorluarneqarnissaat sulissutigiuartariaqaripput. Aningaasanut inatsimmi Oqaasileriffiup sipaarfiginnginnissaa anguniartuassavarput.

Inuit Ataqatigiit

Mimi Karlsen

Inatsisartuni ilaasortaq