Avannaata Kommuniani nunaqarfippassuarni eqqagassalerinikkut iluatsippallanngitsumik, ajorluinnartumillu ingerlatsisoqarpoq.

Eqqagassalerisunik namminersortunngorsaasoqarmat iluatsittunik ilaatigut ingerlalluartunik ingerlasoqarpoq. Assersuutigalugu Kangersuatsiami namminersortoqarpoq ukiuni arlalinngortuni sulillutik misilittagalinnik. Taakkua sulisut marluupput. Taamaattumik eqqagassanik suliaqarnerminni ajornartorsiutiginagu sulinertik nuannaralugu ingerlappaat. Naak ilaatigut eqqagassanik assartuinissami atortutigut ajornartooraagamik nukippassuit atorlugit suligaluarlutik sulinertik ingerlattarpaat. Taamatut sulisut immikkut nersortarpakka suliaq imaannanngitsoq naammassisinnaammassuk.

Nunaqarfippassuaqarporli eqqagassalerinikkut iluatsinniapiloortunik

Assartuutitigut ajornartorsiuteqarnikkut annertuumik nunaqarfinni eqqagassanik suliniarnikkut kinguaattooqqasoqalertarpoq. Eqqagassallu Kommunitoqaangallarattali ajornartorsiu-taanikuuvoq, suli ulloq manna tikillugu arlalitsigut ajornartorsiutaapput annertusiartorlutillu.

Assersuusiorsinnaavunga: Ukiuni kingullerni uanga nammineq nunaqarfinni Tasiusami namminersortunik sulisoqartarpoq. Namminersortutut sulineq aallartilluartarpoq. Atortutigullu atortulutsitaallutik suliniarnerminni nukippassuit atorlugit ingerlanneqalertarpoq.

Namminersortunngortut ATV-nik ajoqutilinnik atortoqartarput. Qamuteralaat ukiukkut assartuutissatut atugassat arlaatigut akornutillit aamma atortoritinneqartarput. Sulineq aallartikkaluarlugu atortutigut ajortooqattaarnerit, kingoraartissanillu nunaqarfimmi imaaliallaannaq pissarsisinnaasannginnermi piffissarujussuaq atorlugu aatsaat kingoraartissanik pissarsiso-qartarsinnaasarluni. Kujammut kingoraartissanik pissarsiniarneq, poortukkat nassiunnerini ilaanni sivisoorujussuarmik utaqqisarneq eqqagassatigut anartarfiillu isumaginissaannut kinguaattoornerit pilersarlutik.

Taamatut pisoqartillugu anartarfiit illut eqqaannut annissuinnarneqartarput. Eqqagassallu katersuinnarneqartarlutik.

Ukiut kingulliit marluk aasaanerani ajornartorsiutit annertunerujussuusarput

Naak ukiut siulii aamma taamatut ittaraluartut ukiut kingulliit marluk assersuutitut annertunerusumik allaaserissavakka.

Ajornartorsiutit aallartittarput ukiukkut upernaakkullu. Tasiusami Kangillerniit Noorliit aqqutaanni qummikajaaqarpoq, taannali ukiukkut apinikkaarujussuusarpoq. Taanna apilluarsimatillugu qamuteralannik aqqutissaajunnaartarpoq. Eqqagassat ingerlanneqarsinnaaunnaartarput. Piffissap sivisuup ingerlanerani amerlanertigut aatsaat aqqutigineqarsinnaalertarpoq. Nunaqarfimmi sulisinnaasunik amigaateqartarneq amerlanertigut peqqutaaqataasarpoq. Upernaakkut aperujussuarsimanerata kingorna aamma aperujussuarsimanngikkaluaraagalluunniit aputip aqillunnerani qamuteralannik ATV-nillu aqqutigineqarsinnaaunnaaraangami eqqagassat anartarfiillu illut eqqaanni katersat annertoorujussuanngortarput. Piffissarujussuarlu atorlugu aatsaat eqqagassanik assartuinissamut aqqusioreernermi eqqagassalerineq ingerlanneqar-sinnaalertarluni.

Ukiunili kingullerni marlunni taamatut ingerlasoqartarpoq. Piffissamili taakkunani namminersortunut suliaq oqimaappallaaleraangat tunuaannartoqartarluni.

Allagartaliinikkullu namminersortussarsiornermi piffissaq aamma sivisooq ingerlasarpoq. Ukiunili kingullerni ajornartorsiutaalernikuuvoq nunaqarfinni ATV-nik ingerlatsissagaanni Kørekorteqaqqaartussaatitaaneq ajornartorsiutaavoq annertooq. Nunaqarfinnimi biileqanngitsumiikkatta kørekorteqarneq atorneqartanngilaq. Ataasiakkaat Royal Greenlandimi Pilersuisumilu sulisut kørekorteqartoqartarput. Qujanartumilli maannakkut kørekortitaartortut amerliartulernikuupput. Illoqarfiliaqqaarluni kørekortitaarniartoqartalernikuuvoq.

Aasaq manna ukiuni kingullerni misigisarsimasat aallaavigalugit nutaamik eqqarsarluni suliniarneq Teknikkimut ingerlatsivimmi sulisumik suleqateqarlunga ingerlappara. Pisut ilinniutigalugit aammalu Avannaata Kommunianut siunissaq ungasinnerusoq eqqarsaatigalugu Kommunitsinnut akeqaraluarluni, eqqagassalerinikkut naammaginarnerusumik sullississoqarnissaa eqqarsaatigalugu, eqqagassalerinikkut inummik ataasiinnarmik sulisitsineq qanorluunniit nukissaqartigisutut misigisimagaluaraanni piffissap ingerlanerani nukippassuarnik atuiffigineqartartoq takusareeratsigu, inunnik marlunnik eqqagassalerisoqarnissaa siunnersuutigaara. Qujanartumillu siunnersuutinga tigulluarneqarluni marlunnik sulisoqarluni sulineq ingerlanneqartussanngorpoq.

Sulisussaaleqisarneq

Ukiuni kingullerni aasaanerani sulisussaqartanngimmat avataaniit suliartortoqartarpoq. Upernaviup eqqaani taamatut sulisitsineq ingerlanneqartalernikuuvoq. Inuup ataatsip suliarisinnaanngisaanik annertoorujussuarnik eqqagassaqarpugut. Qujanaqisumik avataaniit tikittuniit ikiorneqartarpugut aasap ulluini kiannerpaaffiani. Eqqagassarpassuit annertoorujussuit nunaannarmiittut ilai ilanngalaarneqartarput. Tamakkivinneqarneq ajorput, annertoorujussuungamik.

Neriulluarpunga inuit marluullutik sulisinneqartalerpata pitsaasumik sulineq aallartinneqartassasoq.

Avannaata Kommuniani 2021-mut aningaasanik missingersuusiornermi eqqumaffigineqartariaqartutut isigaara nunaqarfiit eqqagassalerinikkut annertuumik ajornartorsiuteqartut ataasiin-naanngitsumik sulisulerneqarnissaat. Aatsaat taama iliornikkut eqqagassalerinikkut pitsaanerusumik sullissineq aallartinneqarsinnaasutut isigigakku.

Ajornartorsiutilli taakkuinnaanngillat

Ajornartorsiutaavortaaq eqqagassanik assartuiniarnermi aqquserngit pitsaannginneri. Tasiusami eqqaaviup tungaanut aqquserngup ilaa aqquserniorneqarnikuugaluarluni qamutinik assakaasulinnik oqimaatsunik atorneqartarnermini aqquserngup ilaa aqqutigissallugu ulorianartorujussuuvoq, innarlernikuugami. Tamaani kørekortillit arlallit ernumagisaramikku atorneq ajorpaat. Ataasiakkaat kisimik Krammerit atorlugit aqqutigisinnaavaat. Taanna pinngitsoorani iluarsineqartariaqassaaq, Krammerit atorlugit eqqagassanik annertuunik assartuineq iluatsittumik ingerlanneqassappat.

Ajornartorsiutit krammeriinnarmiinngillat. Tamaani Sullissivik, eqqagassalerisulluunniit Krammerinik soqanngillat. Royal Greenlandimut Pilersuisumullu attartoqqaarlutik atuisinnaapput. Amerlanertigut suliffeqarfiit matunerini Krammerit atorneqarsinnaasarput. Umiarsuaqartinnagu allatigullu atuisoqanngiffiani attartorneqarsinnaasarluni. Amerlanertigut pilluni pilluni aatsaat attartortoqartarluni.

Avannaata Kommuniani inoqarfiit eqqarsaatigalugit eqqagassalerineq pitsaasumik ingerlassappat Krammerinik nammineq atorsinnaasaannik peqarnissaat kissaatiginaqaaq. Ukiup ingerlanerani aqquserngit nammineq aputaajarlugit ingerlasinnaasassapput. Aputaajaasoqarnissaanik piffissarujussuaq atorlugu utaqqeqqaarani. Taamaalilluni eqqavilerineq anartarfilerinerlu ingerlaannarsinnaassallutik. Ukiukkut upernaakkullu aputinik ajornartorsiuteqartarneq qaangerneqassaaq.

Eqqaavilerinermik ingerlatsineq suliassanik annertuunik sulliviuvoq pingaaruteqarlunilu peqqissaartumik pitsaasumillu suliarineqarnissaa. Nukippassuit atorneqartarput. Inuit nukii atupilullugit sulisitsineq ullumikkumut tulluanngilaq. Eqqaavilerinerup pitsaasumik ingerlanneqannginnara sakkortuumik isoraara. Naleqqussaasoqartariaqarpoq. Piumasaraara pimoorussilluni sulineq ingerlanneqassasoq.

Aasaq manna suliniutitut iluatsittut Avannaata Kommuniani eqqagassalerinikkut aaqqiissuteqarnissamik tikkuussisutit atorneqarnissaat aningaasanik missingersuusiornermi 2021-mut eqqumaffigineqarnissaat suliniutigissavara.

Avannaata Kommuniani Kommunalbestyrelsemi, Nunaqarfinnilu Aqutsisuni ilaasortaq

Regine N. Bidstrup

Share and Enjoy !

0Shares
0 0 0