Qinersisoqarnissaata suaarutigineqarnerata kinguninngua Nunaoil-p siulersuisui tunuarput. Peqqutigisaat erseqqippoq. Naalakkersuisunit piumasaqaatit allanngorsimasut piviusunngortissinnaanagit siulersuisuusimasut isumaqarput.

Naalakkersuisuniilli sunik piumasaqaateqartoqarsimava? Qinersinissallu suaarutigineqarnerata kingorna, politikkikkut aalajangigassat uninngatinneqarsimasussaagaluartut, aatsaat piumasaqaatit saqqummiunneqarpat?

Akissutissarsinissaq ujartoraluarparput

Qinersinissap suaarutigineqarnerata kingorna Naalakkersuisut siulittaasuat Kim Kiel-sen (S) partiit siuttuinik marloriarluni ataatsimiigiaqqusivoq. Ataatsimiinnerni taakkunani Nunaoil pillugu erseqqissunik akisoqarnissaa piumasaqaatigisaraluarparput. Maannamut suli akineqanngilagut tamannalu ernumassutigaarput.

Politikkikkut eqqartuisoqarpa?

Inuit Ataqatigiinnut qitiulluinnarpoq qineqqusaarnerup nalaa politikkikkut aalajangiinerit uninngasussaaneranni politikkikkut aalajangiinissamut tunngavissaqarani aalajangiinernut atornerlunneqassanngitsoq. Taamaammat Naalakkersuisut siulittaasuat toqqaannartumik aperaarput qinersinissap suaarutigineqarnera sioqqullugu Nunaoil pillugu Naalakkersuisuni politikkikkut eqqartuisoqarsimanersoq. Akisoqanngilaq, nalunaarummilli suli takusimanngisatsinnik nassiussisoqarnissaa neriorsuutigineqarpoq.

Naalakkersuinikkut nalornisitsineq unittariaqarpoq

Nunaoil pillugu aalajangiineq sioqqullugu politikkikkut eqqartueqqaartoqarsimanngippat Naalakkersuisut ajorluinnartumik inissisimassapput. Taama issimappat tamat oqartussaaqataanerat atorunnaarsillugu sulisoqarsimassaaq, tamannalu attanneqarsinnaanngilaq.

Isumaqataavugut sipaarfigineqarsinnaasut sipaarfigineqassasut, aamma Nunaoil-mi. Ingerlatseqatigiiffiulli aningaasaqarneranut inatsisinut tunngavilersugaanngittumik politikkikkullu eqqartorneqaqqaarsimanngittumik taama annertutigisumik allannguineq akuerinngilarput. Nalorninartumik naalakkersueriaaseqarneq unittariaqarpoq.

IA-mit erseqqissumik ingerlatsineq piumasaraarput

Inuit Ataqatigiinnit aammaarluta Naalakkersuisunut inassuteqassaagut Nunaoil-mut oqaaseqaatertik avammut saqqummiutissagaat. Innuttaasut Inatsisartullu pisunik ilisimatinneqartariaqarput. Naalakkersuisut qinersinissap suaarutigineqannginnerani politikkikkut eqqartuisoqaqqaarsimaneranik apeqqummut erseqqissumik akissuteqarnissaat aamma inassutigaarput. Taama iliortoqarsimassanngippat Naalakkersuisut siulittaasuat nassuiaasariaqassaaq.

Naalakkersueriaaseq isertortoq unilluni erseqqissumik ingerlatsisoqartariaqarpoq.

Sara Olsvig

Siulittaasoq, Inuit Ataqatigiit.