Nunanut Allanut Sillimaniarnermullu Ataatsimiititaliaq

Nunanut Allanut Sillimaniarnermullu Ataatsimiititalimut Inuit Ataqatigiit ilaasortaatitaatut tupaallaatiginngitsuunngilarput tusagassiuutitigut paasigatsigu qaammatini arlalinngortuni Naalakkersuisut USA-mik ima qanitsigisumik attaveqarsimasut allaat mittarfiit pillugit aningaasaliinissamut isumaqatigiissut atsiorneqassalluni piariingajaliivissimalluni.

  • Tupaallaatiginngitsuunngilarput atuaratsigu mittarfiit pingasut pillugit misissuinissamut USA Nunatsinniit attaveqarfigineqarsimammat, tamannalu aasarli pisimalluni, aalajangiinissarlu qanittuaranngorsimasoq. Suli tupigusunnarnervoq Nunanut Allanut Naalakkersuisoqarfiup tusagassiuutitigut uppernarsarmagu mittarfiit pineqartut mittarfiliorfigineqartussat amerikarmiunit tikeraarneqarsimasut.

  • Tupaallaataavallaarnavianngikkaluarpoq susoqarnera pillugu Nunanut Allanut Sillimaniarnermullu Ataatsimiititaliaq sukumiisumik ilisimatinneqarsimasuuppat. Akerlianilli paasissutissat tigussaasut Naalakkersuisuniit Ataatsimiititaliamut tunniunneqartut ikittuararsuusimapput, tamannalu naammaginanngilluinnarpoq. Pissusissamisoorsinnaanngilaq ataatsimiititaliami ilaasortat tusagassiuutit aqqutigalugit malinnaassariaqassappata Nunatta avammut attaveqarnera pillugu apeqqutit eqqartorneqartillugit. Akulikippallaanik pisalerpoq tusagassiuutit aqqutigalugit ilisimasariaqakkatsinnik pissarsisarnerput.

Taamaattumik Inuit Ataqatigiit Nunanut Allanut Sillimaniarnermullu Ataatsimiititaliaanut ilaasortaasut ullumikkut piumarivarput Nunanut Allanut Naalakkersuisoq siunersiorneqassasoq, taamaasilluta nunanut allanut sillimaniarnermullu tunngasuni Naalakkersuisut suut suliarineraat pillugit pisariaqartumik ilisimasassatinnik pisinnaajumalluta. Taamaalilluni Inatsisartut aamma qanimut peqataaffigisaannik sulineq ingerlasinnaaqqullugu.

Ataatsimiititaliami Siulittaasup Tullia Mimi Karlsen & Ilaasortaq Sofia Geisler