Nipisaat suaanik pisasseeqqipput sineriammi aalisartut pilliutigalugit

Inuit Ataqatigiit Politikkikkut Oqaaseqartartuat

Aqqaluaq B. Egede

Pisortatigoortumik uppernarsarneqarpoq nunatsinni nipisaat suaanik tunisassiorneq akitigut ajorserujussuarsinnaasoq. Naalakkersuisut Nuummi Maniitsumilu pisassiissutaareersut qaavisigut 204 tonsinik pisasseeqqinnerat niuernermi akinut innarleerujussuaqqajaavoq. Naalakkersuisut politikkikkut taamak aalajangernerat aalisartorpassuit sineriammi eqqorneqaatigivaat, siunissamilu suli malugissavaat.

Nuup Maniitsullu avataani aalisartut nipisaat suaannik tunisassiortut mattunneqarput. Pissutigerpiarpaa Naalakkersuisut Nuummi Maniitsumilu pisasseeqqinneranni MSC-mik toqqammavit navianartorsiortilermassuk. Navianartorsiortitsinerlu anneruleqqunagu tunitsiviit matusipallattariaqalerput.  Allatut oqaatigalugu, aalisartut Nuup Maniitsullu aqutsiveqarfianiinngitsut akilerpaat Nuummi Maniitsumilu aalisartut pisassaminnik nunguutsereersut pisasseqqinneqarnissaat.

MSC-ip annaaneqarnissaa maanna periarfissagissaalersoq pissappat malitseqassaaq nipisaat suaasa akimikkut malunnaatilimmik apparujussuarnerannik. Naalakkersuisut pisasseeqqinnerminni nunatta sinnerani aalisartorpassuit aningaasarsiorsinnaanerat mattuppaat. Nipisaallu suaannik tunisassiornerup aningaasarsiornikkut isumalluutaasinnaanera navianartumik inissillugu.

Demokraatit piujuartitsinermik tunngaveqarumanertik qimannerpaat? MSC-mik tunngaveqarumanertik qimannerpaat? Apeqqusiigama tupigusunnermik aallaaveqanngilaq, takusareerparpummi Demokraatit politikkikkut kinaassutsiminnik arlaleriaqalutik parti Siumumut pilliuteqarsimaqisut. Aamma arlaleriaqalutik qineqqusaarnermi neriorsuutitik qimallugit pilliutigalugillu pissaanermi inissisimanertik annanniarsarisarat sungiusimalereerparput. Tamannali Demokraatit qinersisartuinik qoqassiinerummat tatiginassutsimik apeqqusiiffigissallugu inerteqqutaanngilaq.

MSC aalisakkat tunisassiallu allat imaaneersut akiinut aalajangiisuulluinnartuuvoq. Nunarsuatsinnimi aalisakkanik tunisassiornermi pisisartut piumasaqaatigaat soqutiginngitsuusaarsinnaanngisarput. Suliassaqarporli pingaarutilimmik. Qulakkeertariaqarpoq Naalakkersuisut MSC-mik nunatta tunngavia navialisissallugu ilisimareerlugu aalajangersaasimanersut. Taamaassimappat aalisartut, kommunit, tunitsivinni sulisartut aamma nunatsinni aningaasarsiornikkut siammasissumik atugassaqartitsineq ataatsimut innarlersimassammassuk.

Inuit Ataqatigiit sinnerlugit Naalakkersuisut pisasseeqqinnerminni kukkorujussuarnerat qulaajaavigineqassasoq piumasaraarput. Nunatsinni aalisartut aamma nunatta aningaasarsiornera ataatsimut isigalugu pitsaanngitsumik inissittoqarnera ernumanartumillu siunissami sunniuteqarsinnaanera nipangiinnarluni akuersaarneqarsinnaanngilaq. Oqallisigineqartariaqarpoq aamma partiit tamarmik erseqqissumik isummerfigisariaqarpaat. Pinngaartumik naalakkersuisooqatigiit Demokraatillu ulloq ataaserluunniit isertuussinatik ammasumik isummersinnaassappata qujanassagaluaqaaq. Anngaaginnarluni apeqqusiisarnanilu naalakkersuinikkut ingerlatsineq torrallataanngilaq.

Share and Enjoy !

0Shares
0 0 0