Inuiaat siuariartortut – Kommune nukittooq
Inuit Ataqatigiit Qeqertalimmi innuttaasut qitiutillugit ataatsimoorlutik ineriartortitsinertik ingerlateqqissavaat. Inuiattut naleqartitavut nunarsuarmioqataanerlu aallaavigalugit ingerlatsisoqassaaq.
Timi tarnilu nukittuut – imminut pilersorneq – imminut napatinneq
Ukiuni tulliuttuni Kommune Qeqertalimmi inoqarfinni tamani, ineriartornermut naleqquttunik ine-qarnikkut, imeqarnikkut, eqqagassaqarnikkut kuuffilersuinikkullu suliassat ullutsinnut naleqquttumik ine-risaqqinneqassapput.
Ineqarneq inuttut, peqqissutsikkut atugarissaarnermullu qitiuvoq pingaarteqisarput. Kikkut tamarmik inissaqassapput – akilersinnaasaminnik. Kommune Qeqertalimmi ineqarnikkut periarfissarititaasut inerisarlugit ingerlaqqissaagut.
Atuarfeqarnikkut pitsanngorsaaneq nangeqqissavarput. Meeqqat atuarfianni suliniut, ukiuni tallimani tulliuttuni ingerlanneqartussaq inerisarlugu nanginneqassaaq. Anguniarlugu meeqqat inuusuttut inuunermi nukittuumik tunngavissinneqarnissaat. Piorsarsimassutsikkut pinaveersaartitsinikkullu suliat piorsaanermi qitiusumik pingaartinneqassapput.
Inoqarfiit peqqinnartumik inuuneqarnissaat siunertaralugu suliniutit nangeqqissavagut, taamatut suliniuteqarnermi susassaqartut peqqinnissamut inooqatigiinnermullu suliassaqarfiusut suleqatigineqassapput. Maligassiuineq suliniutini tamani aqutsinermilu ersarissuunissaa suliarissavarput. Sullitatsinnut tatiginartuunissarput pingaartipparput.
Inoqarfinni nammineq pilersitsinikkut siuariartussaagut
Aqutsinikkut inoqarfinni tamani namminneerluni aqutsineq annertusarneqassaaq, innuttaasut namminneq pilersitsisinnaassusaat upperaarput tunngavigiuassallugulu.
Inoqarfinni sullissinerit innuttaasut peqatigalugit ingerlanneqassapput. Piginnaanngorsaaneq eqaatsumillu sullissiviit ingerlanissaat pingaartillugu pitsanngorsartuarlugulu sulissaagut.
Innuttaasut inatsisitigut illersugaanerat pitsaasoq
Kommune Qeqertalimmi innuttaasut inatsisitigut illersugaanerat pitsanngorsarlugu sulissaagut. Inoqarfinni kommunefoged-eqanngitsuni politeeqanngitsunilu suliassaqarpugut. Kangaatsimi politeqarfeqalernissaa Folketingimi Inatsisartunilu ilaasortaatitavut peqatigalugit sulissutigissavarput. Innuttaasut toqqissisimallutik inoqarfinni inooqataasinnaanerat naapertuilluartumik inatsisitigut sinaakkuserneqarnissaat suliarissavarput.
Imminut pilersorneq suliarissavarput
Kommune Qeqertalimmi imminut pilersornerup annertusarlugu aaqqissuussaasumik ingerlanneqarnissaa siunertaralugu sulissaagut. Niuernikkut suleqatigisinnaasagut aningaasallu nunatta iluani kaaviaarnerunissaat siunertaralugu sulissaagut.
Atuarfiit meeqqeriviit utoqqaallu illuisa annertunerusumik nunatta pissarititaanik pilersoneqarnissaat aqqutissiuutissavarput.
Kommune Qeqertalimmi siunniussagut suliassat angujumallugit innuttaaqatitsinnut kommunenut Namminersorlutillu Oqartussanut suleqatiserinnissaagut. Kommune Qeqertalimmi allaffissornikkut nutarterinerput nangittumik suliarissavarput, aqutsinerlu innuttaasunut pitsaanerpaaq salliutillugu suleqqissalluta.
Thomas Petersen Múte Bourup Egede
Niaqornaarsummi Siulittaasoq
Inuit Ataqatigiit Inuit Ataqatigiit
Siulittaasuat