Nalorninarnerpaamik inissittoqarpoq

Demokraatit aggustimi nalunaarput Kim Kielsen-i akisussaaffimmik tiguseqqullugu, taamaaliornianngippallu tunuaqqullugu.

Tulluarnerusimassagaluarpoq Demokraatit akisussaassuseqarunik naalakkersuinikkut akisussaaffimmik tiguseqataasimasariaqaraluarput.

Naalakkersuisooqataalernani ikinnerussuteqartunilli naalakkersuisunngortussanik tapersersuisunngorneq akisussaassusermik annikinnerpaamik iliuuseqarneruvoq.

Naalakkersuinikkut suliat siunissami ukiorpassuarni aningaasaqarnitsinnut sunniuteqartussat sammissavagut. Tamanna toqqissisimanartumik pisinnaajunnaarpoq ullormiit ullormut sangujoraartumik naalakkersuisoqalernissaa Demokraatinit atuuttussanngortinneqarmat

Siunissamut ungasinnerusumut pilersaarusiorluni katersuuffeqarlunilu sulineq ajornarsivoq, ullormiit ullormut isumaqatiginninniarfiit piumasaqaataat aallaavigalugit politikkikkut allanngorartumik aqutseriaaseqartoqalissammat.

Inuit Ataqatigiit pissaaneqarniat suna tamaat akigalugu atajumasut akuersaannginnatsigit erseqqissarumavarput. Massakkummi aamma Demokraatit Siumut tatigisinnaanagu oqaaseqaatigalutik suleqatigiumallugit siuttuuinnarnissaannik kaammattuinerat sumik patsiseqarpa?

Nalilersueqqittoqarniarli nunatta inuisalu nalorninartumik inissinnerat aaqqinneqarlunilu torersumik aqunneqarnissaat timitalerumallutigu.

Múte B. Egede
Inatsisartut gruppiata Siulittaasua
Inuit Ataqatigiit